Հունգարիան հանդես է գալիս Ռուսաստանի դեմ տնտեսական պատժամիջոցների հնարավորինս շուտ վերացման օգտին և չի աջակցում Ռուսաստանից էներգակիրների մատակարարումն արգելելու Եվրահանձնաժողովի ծրագրին: Այս մասին հայտարարել է Հունգարիայի կառավարության ղեկավար Վիկտոր Օրբանը՝ ելույթ ունենալով Բուդապեշտում Եվրամիության երկրների խորհրդարանների խոսնակների համաժողովի մասնակիցներին։
Նա ընդգծել է, որ դեմ է Բրյուսելի նախաձեռնությանը, որը կառաջացնի նավթի, գազի ու էլեկտրաէներգիայի գների բարձրացում եւ «ուղղակի կսպանի Հունգարիայի տնտեսությունը»։ «Պատկերացրեք, որ տնային տնտեսությունների և ընկերությունների համար էներգիայի գները, ի վերջո, կկրկնապատկվեն, հունգարական ընտանիքները չեն դիմանա դրան», - ասել է վարչապետը:
Օրբանը նշել է, որ հենց դա է պատճառը, որ Հունգարիան հանդես է գալիս Ուկրաինայի հակամարտության շուտափույթ կարգավորման օգտին։ Նրա խոսքով՝ «հունգարացիները խաղաղություն են ուզում, եւ նրանք կցանկանային հնարավորինս արագ ազատվել Բրյուսելի տնտեսական պատժամիջոցների քաղաքականությունից»։
Ավելի վաղ Հունգարիայի կառավարությունը հայտարարել էր, որ առաջիկա տարիներին Ռուսաստանից էներգակիրների ներկրումը դադարեցնելու Եվրահանձնաժողովի ծրագիրը կհանգեցնի երկրում տարեկան մինչև 2 միլիարդ եվրոյի լրացուցիչ ծախսերի։
