Չինաստանը Հնդկաստանին և Պակիստանին կոչ է անում զսպվածություն դրսևորել և խուսափել գործողություններից, որոնք կարող են էլ ավելի սրել իրավիճակը, ասվում է Չինաստանի ԱԳՆ-ում։
Ավելի վաղ Geo TV հեռուստաալիքը, վկայակոչելով Պակիստանի բանակի հասարակայնության հետ կապերի բաժնի ղեկավար, գեներալ-լեյտենանտ Ահմեդ Շարիֆ Չաուդրին, հայտնել էր, որ Հնդկաստանը հրթիռներ է արձակել Պակիստանի երեք ավիաբազաների ուղղությամբ, այդ թվում՝ Նուր Խանի ավիաբազայի, Մուրիդ ավիաբազայի և Շորկոտի ավիաբազայի ուղղությամբ, որը հայտնի է որպես Ռաֆիկի ավիաբազա։
Միաժամանակ, հնդկական ANI լրատվական գործակալությունը, հղում անելով աղբյուրներին, պնդում է, որ խոցվել են Պակիստանի չորս ավիաբազաներ, թեև չորրորդի անունը չի նշվում։
«Չինաստանն ուշադիր հետևում է Հնդկաստանի և Պակիստանի միջև տիրող իրավիճակին և խորապես անհանգստացած է սրացումներով։
Մենք հորդորում ենք Հնդկաստանին և Պակիստանին առաջին տեղում դնել խաղաղությունն ու կայունությունը, պահպանել հանգստություն և զսպվածություն, վերադառնալ խաղաղ քաղաքական կարգավորման ուղուն և խուսափել գործողություններից, որոնք կարող են էլ ավելի սրել իրավիճակը», - ասվում է Չինաստանի ԱԳՆ-ի կայքում։
