Hraparak.am-ը գրում է.
ՀՀ պաշտպանության նախարարությունը դեռևս մայիսի 7-ին հաղորդագրություն էր տարածել այն մասին, որ ադրբեջանական ԶՈՒ ստորաբաժանումները կրակ էին բացել Սյունիքի մարզի Տեղ համայնքի Խնածախ բնակավայրի ուղղությամբ: Կրակոցների արդյունքում վնասվել էր բնակելի տան տանիքը:
Խնածախ գյուղի բնակչուհին «Հրապարակի» հետ զրույցում ասել է, որ կրակոցները երկու ամիս է՝ շարունակվում են, իսկ վնասներն ավելի շատ են:
«Գիշերը` 22.30-ից սկսում են, մինչև առավոտվա 06.00-ն, 07.00-ն կրակում են: Տների կռիշաներին լրիվ պատրոն է կպել, գյուղում վիճակ չկա, գյուղամիջի հատվածների տների վրա են կրակոցները: Խոզնավարի ու մեր Խնածախի վրա են կրակել, բայց Խոզնավարն ավելի բեթար է»,- ասել է Խնածախի բնակչուհին:
Հիշեցնենք, որ «Հրապարակը» տեղեկացրել էր, որ վերջերս ՔՊ-ական պատգամավորներից ու մարզպետից սկսած, վերջացրած էկոնոմիկայի և ՏԿԵ նախարարներով, այցելեցին ու լուսանկարներ հրապարակեցին Խոզնավար ու Խնածախ բնակավայրերում իրենց այցելություններից, նույնիսկ գառ են մորթել, ու քեֆ-ուրախության ձայներն ամբողջ գյուղում են լսել:
Գյուղամիջում տղամարդկանց հետ են հանդիպել, ադրբեջանական կողմից հնչող կրակոցներից են խոսել:
«Խնածախում տուն չի մնացել, բոլորը քոչում են, այդ գազի տրուբաները գյուղը գեղեցկացնելու համա՞ր են քաշել, գոնե թող դա բերեն-հասցնեն մարդկանց տուն: Տուն կա` չորս հարյուր հազար պիտի վճարի, որ իր տուն գազ քաշի, որտեղի՞ց այդքան գումար մարդիկ վճարեն: Չեն ասում` այս մարդկանց օգնենք, եկել են, ինչ են ասում: Մի օր առաջ էլ, որ լրատվամիջոցների հետ զրույցում մեր բնակչուհին ասել էր, վերևները պիտի հասկանան, թե ինչի են ադրբեջանցիները կրակում, մեր գյուղի տղամարդկանց հետ իշխանականները հանդիպման ժամանակ ասել էին, թե բա ձեր բնակչուհին ինչի է ասում, թե վերևները պիտի հասկանան: Բա ո՞վ պիտի հասկանա՝ մե՞նք: Կրակոցների մասին են խոսել մարդկանց հետ: Իրենք պիտի գան, գիշերը մնան, որ իմանան` ինչպես ենք ապրում, թե մեր էրեխեքը ոնց են ապրում»,- ասել է Խնածախի բնակչուհին:
Ավելի մանրամսն՝ սկզբնաղբյուրում։
