Արկանզասի համալսարանի գիտնականները պարզել են, որ ներարկային քաշի կորստի դեղամիջոցները մարդկանց խրախուսում են հրաժարվել ոչ միայն արագ սննդից, այլև գազավորված ըմպելիքներից և կարմիր մսից։ Հետազոտության արդյունքները հրապարակվել են «Սննդի որակ և նախընտրություն» ամսագրում։
GLP-1 կամ գլյուկագոնանման պեպտիդ-1 ընկալիչների ագոնիստների դասին պատկանող դեղամիջոցները (օրինակ՝ Օզեմպիկը) սկզբնապես մշակվել են 2-րդ տիպի շաքարախտի բուժման համար։ Սակայն դրանց ախորժակը և մարմնի քաշը նվազեցնելու ունակությունը թույլ է տվել դեղամիջոցներն օգտագործել ճարպակալման բուժման մեջ։ Ուսումնասիրությունները ցույց են տվել, որ այս մթերքների օգտագործումը հեշտացնում է շաքարից, արագ սննդից և ալկոհոլից հրաժարվելը։
Նոր հարցմանը մասնակցել է մոտ 2000 մարդ, որոնք բաժանվել են չորս խմբի՝ GLP-1-ի ներկայիս օգտագործողներ, դասընթացն ավարտածներ, այն սկսելը պլանավորողներ և վերահսկիչ խումբ։ GLP-1 ընկալիչների ագոնիստներ օգտագործողների ավելի քան 70%-ը նշել է գերմշակված սննդի՝ գործարանային արտադրության քաղցրավենիքի, չիպսերի և սառը մսի օգտագործման նվազում։ Եվս 50%-ը հայտնել է գազավորված ըմպելիքների և կարմիր մսի նկատմամբ ունեցած ցանկության նվազման մասին։
Սակայն հետազոտողները նշում են, որ անառողջ սննդի նկատմամբ ցանկությունը լիովին չի անհետանում՝ այն միայն դառնում է ավելի քիչ արտահայտված։ Սննդամթերքի միակ կատեգորիաները, որոնց սպառումն աճել է, մրգերն են, կանաչեղենը և ջուրը։
Հեղինակները ընդգծում են, որ GLP-1 դեղամիջոցների աճող ժողովրդականությունն արդեն սկսել է ազդել սննդի շուկայի վրա՝ ստիպելով արտադրողներին վերանայել իրենց արտադրանքի տեսականին և արտադրել այնպիսի ապրանքներ, որոնք ավելի լավ կբավարարեն սպառողների նոր նախասիրությունները։
Թարգմանությունը՝ Euromedia24.com-ի
