Հռոմի պապ Ֆրանցիսկոսին կհուղարկավորեն շաբաթ օրը՝ ապրիլի 26-ին, այս մասին հայտնում է РИА Новости-ն՝ հղում անելով Վատիկանի մամուլի ծառայությանը։
«Շաբաթ օրը՝ 2025 թվականի ապրիլի 26-ին, առավոտյան ժամը 10:00-ին, Ֆրանցիսկոսի հոգեհանգստյան պատարագը կմատուցվի Սուրբ Պետրոսի տաճարի առջև, ինչպես նախատեսված է Ordo Exsequiarum Romani Pontificis-ում», - ասել է Պապական պատարագների ծառայության ղեկավար մոնսինյոր Դիեգո Ռավելլին:
Լատինական վերնագիրը թաքցնում է «Հռոմեական պապի հուղարկավորության կարգը»՝ հատուկ փաստաթուղթ, որը մանրամասն նկարագրում է Պապի հուղարկավորության գործընթացը: Հուղարկավորությունը կնախագահի Հռոմի կաթոլիկ եկեղեցու Կամերլենգոն՝ կարդինալը, որը ղեկավարում է Վատիկանի գործերը՝ մինչև նոր պապի ընտրությունը։ Պաշտոնը ներկայումս զբաղեցնում է իռլանդական ծագմամբ ամերիկացի կարդինալ Քևին Ֆարելը։
Հռոմի Ֆրանցիսկոս պապին կհուղարկավորեն Հռոմի Սանտա Մարիա Մաջիորե տաճարում։ Հրապարակված կտակի համաձայն՝ գերեզմանը պետք է լինի պարզ, առանց զարդարանքների, մեկ մակագրությամբ՝ Ֆրանցիսկոս։
Հռոմի պապ Ֆրանցիսկոսը մահացել է ապրիլի 21-ին՝ Սուրբ Զատիկի հաջորդ օրը։ Նա 88 տարեկան էր։ Պոնտիֆիկոսը վերջերս առողջական խնդիրներ ուներ։ Ըստ Vatican News-ի՝ կաթվածը կոմայի և սրտի կանգի պատճառ է դարձել։
