ԱՄՆ նախագահ Դոնալդ Թրամփն առաջարկել է Հարվարդի համալսարանը զրկել հարկերից ազատման կարգավիճակից, քանի որ, նախագահի կարծիքով, այդ ուսումնական հաստատությունը խթանում է վտանգավոր գաղափարախոսական շարժումներ։ «Գուցե Հարվարդը պետք է կորցնի իր հարկերից ազատված կարգավիճակը և հարկվի որպես քաղաքական կազմակերպություն, եթե շարունակի խթանել քաղաքական, գաղափարախոսական և ահաբեկչությունից ոգեշնչված/աջակցող «հիվանդությունը»։ Հիշե՛ք, հարկերից ազատված կարգավիճակը լիովին կախված է հանրային շահերից ելնելով գործելուց», - գրել է Թրամփը իր Truth Social սոցիալական ցանցում։
ԱՄՆ Կրթության նախարարությունն ավելի վաղ հայտարարել էր, որ կրճատում է Հարվարդի համալսարանին տրամադրվող պետական ֆինանսավորումը 2.2 միլիարդ դոլարով։ Ամերիկյան լրատվամիջոցները հաղորդել են, որ Թրամփի վարչակազմը համալսարանի ղեկավարությանը մի շարք պահանջներ է ներկայացրել ֆինանսավորումը պահպանելու վերաբերյալ, այդ թվում՝ հրաժարվել «Բազմազանություն, հավասարություն և ներառում» (DEI) ծրագրից։
