Մախաչկալայի «Գազպրոմ գազաբաշխիչ» ընկերության վերանորոգման և տեխնիկական սպասարկման վարպետները տեղափոխվել են նախնական կալանքի վայր՝ բազմաբնակարան շենքում գազի պայթյունի գործի շրջանակներում։ Այս մասին Telegram-ի իր ալիքում հայտնել է Դաղստանի Հանրապետության ընդհանուր իրավասության դատարանների մամուլի միասնական ծառայությունը։
Հայտարարության մեջ նշվում է, որ համապատասխան որոշումը կայացրել է Մախաչկալայի Լենինյան շրջանային դատարանը։
«Դատարանը վճռել է կասկածյալի նկատմամբ խափանման միջոց ընտրել կալանավորումը՝ երկամսյա ժամկետով, այսինքն՝ մինչև 2025 թվականի մայիսի 25-ը»,- ասվում է տեքստում։
Մամուլի ծառայությունից հայտնում են, որ ձերբակալվածի նկատմամբ քրեական գործ է հարուցվել ՌԴ քրեական օրենսգրքի 238-րդ հոդվածի 2-րդ մասի «բ» կետով։ Խոսքը սպառողների կյանքի և առողջության անվտանգության պահանջներին չհամապատասխանող աշխատանքների կատարման մասին է։
Մախաչկալայի Գապցախսկայա փողոցում գտնվող բնակելի շենքում գազի պայթյուն է տեղի ունեցել մարտի 25-ի առավոտյան։ Դաղստանի առողջապահության նախարարությունը հայտնել է, որ չորս մարդ վիրավորվել է՝ մեկ տղամարդ և երեք կին։ Տուժածներից մեկի՝ այն բնակարանի սեփականատիրոջ վիճակը, որտեղ տեղի է ունեցել պայթյունը, գնահատվում է ծանր։
Այս ֆոնին մարզային դատախազությունը հետաքննություն է կազմակերպել։ Քննիչներն իրենց հերթին քրեական գործ են հարուցել։
Ինչպես հայտնի է դարձել, շենքը շահագործման չի հանձնվել։ Չնայած դրան՝ այնտեղ մարդիկ էին ապրում, իսկ բնակարանները վաճառվում էին։
Թարգմանությունը՝ Մանուել Թամազյանի
