Գագաուզիայի բոլոր իշխանությունները շարունակում են իրենց բնականոն աշխատանքը շրջանի ղեկավար Եվգենյա Գուցուլի ձերբակալությունից հետո, հայտարարել է ինքնավարության ղեկավարի առաջին տեղակալ Իլյա Ուզունը։
Քիշնևի շրջանային դատարանը ուրբաթ օրը մասամբ բավարարել է դատախազների պահանջը և Գուցուլին 20 օր ժամկետով կալանավորելու որոշում կայացրել։ Պաշտպանական կողմը մտադիր է բողոքարկել այս որոշումը։
«Մենք հստակ հայտարարում ենք. Գագաուզիան չի հանձնվում: Գործադիր կոմիտեն, Գագաուզիայի Ժողովրդական ժողովը և ինքնավարության բոլոր իշխանությունները շարունակում են աշխատել սովորական ռեժիմով։ Մեր հողի վրա արտաքին վերահսկողություն, Քիշնևում նշանակվածներ չեն լինելու։ Մենք՝ Գագաուզիայի հայրենասերներս, թույլ չենք տա ոտնահարել մեր ինքնավարությունը և մեր իրավունքները»,-ասել է Ուզունը Facebook սոցիալական ցանցի իր էջում հրապարակված տեսաուղերձում։
Նա նշել է, որ գործկոմը առաջիկայում կհայտարարի հետագա քայլերի մասին։ Գուցուլը ձերբակալվել է մարտի 25-ին Քիշնևի օդանավակայանում և տեղափոխվել Ազգային հակակոռուպցիոն կենտրոն։
