Եվրամիությունը (ԵՄ) դժվարություններ կունենա՝ փորձելով ինքնուրույն իրականացնել եվրոպական մայրցամաքի ռազմականացման ծրագրերը՝ առանց Միացյալ Նահանգների մասնակցության: Այսպիսի եզրակացության է եկել Euractiv պորտալը։
Ինչպես նշում է պորտալը, եթե Եվրոպան մտադիր է «ձևավորել ցանկացողների և ունակների երկարաժամկետ կոալիցիա՝ որպես մայրցամաքի անվտանգության պատվար, նրա համար դժվար կլինի պաշտպանությունը միայնակ պահել»: Պորտալն ընդգծում է, որ այս պահին Եվրոպային մինչև 2030 թվականը ռազմականացնելուն ուղղված նախաձեռնությունները «կան միայն թղթի վրա և նախագծերում»։
Ըստ Euractiv-ի վերլուծության՝ Եվրոպան բախվում է բազմաթիվ ոլորտներում մարտահրավերների: Մասնավորապես, ԵՄ երկրները բարձր տեխնոլոգիական հակաօդային և հակահրթիռային պաշտպանության համակարգերի պակաս են զգում։
Կադրերի քանակով եվրոպական բանակները լրջորեն զիջում են ամերիկյանին։ Պորտալի տվյալներով՝ միայն մի քանի եվրոպական երկրներ ունեն մոտ 100 հազար զինվորական, որոնք ներկայումս ներգրավված չեն ոչ մի ռազմական գործողության մեջ, ինչը մոտ հինգ անգամ պակաս է ԱՄՆ-ից։
Ռազմավարական հետազոտությունների միջազգային ինստիտուտի (IISS) տվյալներով՝ ՆԱՏՕ-ի եվրոպական անդամներն ունեն մոտ 1 միլիոն այդպիսի զինվոր, սակայն պորտալը նշում է, որ զորքերի ռոտացիայի անհրաժեշտության պատճառով նրանք բոլորը չեն կարողանա միաժամանակ լինել ճակատում։
