Ամերիկյան միլիարդատեր Ջեֆ Բեզոսին պատկանող Amazon Prime Video վիդեո հարթակը ԱՄՆ առաջին տիկին Մելանյա Թրամփին վճարել է մոտ 28 միլիոն դոլար՝ իր մասին վավերագրական ֆիլմ ցուցադրելու իրավունքի համար, գրում է Financial Times թերթը՝ հղում անելով գործին ծանոթ մարդկանց։
«Պլատֆորմը 40 միլիոն դոլար է վճարել Մելանյա Թրամփի մասին վավերագրական ֆիլմի համար, այս գումարից մոտ 28 միլիոնը կհատկացվի անմիջապես առաջին տիկնոջը»,- գրում է հրատարակությունը։
Նշվում է, որ այս որոշումը Բեզոսն ընդունել է Թրամփի հետ կապված ռազմավարության փոփոխության շրջանակներում։
Պարբերականը նաև մատնանշում է, որ վերջերս Amazon-ը իրավունք է ձեռք բերել ցուցադրելու «The Apprentice» շոուի հին դրվագները, որին մասնակցում է ԱՄՆ նախագահ Դոնալդ Թրամփը։
Սա ամերիկյան նախագահին ֆինանսավորելու և նրան սիրաշահելու ևս մեկ միջոց է, ընդգծում է հրատարակությունը։
