Հայաստանում իններորդ դասարանից հետո շրջանավարտների շուրջ 30.1 տոկոսը կրթությունը շարունակում է քոլեջներում, 9-րդ դասարանից հետո կրթությունը չշարունակողների համամասնությունը նվազել է:
ԱԺ մարդու իրավունքների պաշտպանության և հանրային հարցերի հանձնաժողովի նիստում կառավարության ծրագրի՝ 2024 թվականի կատարման ընթացքի և արդյունքների այս մասին զեկույցի ներկայացմանն ասաց ՀՀ կրթության, գիտության, մշակույթի և սպորտի նախարար Ժաննա Անդրեասյանը:Անդրեասյանը պարտադիր կրթության մեջ ներգրավվածության տեսանկյունից լուրջ առաջընթաց է նկատում:
Եթե 2018-ին պարտադիր կրթության մեջ ներգրավվածությունը 72 տոկոս էր, 2023-ին դարձել է 88 տոկոս: Նախարարը խնդրահարույց համարեց 9-րդ դասարանից հետո կրթությունը շարունակող երեխաների ցուցանիշները: Որոշ երեխաներ 9-րդ դասարանից հետո կրթությունը չշարունակելու փորձառություն էին ունենում:
2017 թվականին ավագ դասարաններում կրթությունը շարունակում էր 9-րդ դասարանի շրջանավարտների 54 տոկոսը, այսինքն՝ գրեթե կեսը չէր շարունակում կրթությունն ավագ դասարաններում:
Անդրադառնալով 2023-2024 ուսումնական տարվան՝ Անդրեասյանն ասաց. «9-րդ դասարանն ավարտել և վկայական է ստացել շուրջ 39 հազար երեխա: Նրանցից ավելի քան 24 հազարը կրթությունը շարունակել են ավագ դասարաններում, ավելի քան 12 հազարը՝ քոլեջներում:
9-րդ դասարանից հետո քոլեջներում կրթությունը շարունակողների ցուցանիշը դարձել է ընդհանուր շրջանավարտների մեջ շուրջ 30.1 տոկոս»:
Նախարարը կարծում է, որ դա շատ լավ ցուցանիշ է և ցույց է տալիս, որ մասնագիտական կողմնորոշումը և ավելի նպատակուղղված կրթության շարունակությունը դառնում են ավելի տիրապետող վարքականոն:
«9-րդ դասարանից հետո կրթությունը չշարունակողների համամասնությունը նվազել է մինչև 5.9 տոկոս, ինչը 2018-ի համեմատ ավելի քան 20 տոկոսով բարելավված արդյունք է»,-նշեց նա:
Քոլեջների ընդունելությունը 2024-ին 2023-ի համեմատ գրանցել է ավելի քան 11.4 տոկոս աճ:
Ներկայումս քոլեջներում սովորում է շուրջ 45 հազար ուսանող: Նախարարը սա երկրի տնտեսության համար ևս լավ ցուցանիշ համարեց:
