Հունգարիան հույս ունի, որ Ռուսաստանի նախագահ Վլադիմիր Պուտինի և Ամերիկայի առաջնորդ Դոնալդ Թրամփի առաջիկա բանակցությունները կհանգեցնեն երկու երկրների հարաբերությունների կարգավորմանը և Ուկրաինայում խաղաղությանը, ինչը կբարելավի իրավիճակը Կենտրոնական Եվրոպայում։ Այս մասին հայտարարել է Հունգարիայի արտաքին գործերի և արտաքին տնտեսական կապերի նախարար Պետեր Սիյարտոն՝ «Ռաիսինա երկխոսություն» քաղաքագիտական համաժողովի շրջանակում պատասխանելով ՏԱՍՍ-ի հարցին։
«Հուսով եմ, որ Պուտինն ու Թրամփը համաձայնության կգան, թե ինչպես կարգավորել հարաբերությունները ԱՄՆ-ի և Ռուսաստանի միջև, քանի որ մենք պատմական փորձ ունենք Կենտրոնական Եվրոպայում. որքան լավ լինեն ԱՄՆ-ի և Ռուսաստանի հարաբերությունները, այնքան լավ մեզ համար»,- ասել է նա։
«Երբ ԱՄՆ-ն ու Ռուսաստանը վատ հարաբերություններ ունեին, դա վատ էր մեզ համար: Բայց երբ նրանք լավ հարաբերություններ ունեին, մեր վիճակը շատ ավելի լավ էր, իսկ մեր տարածաշրջանը շատ ավելի ապահով: Ուստի, մենք հուսով ենք, որ նախագահ Թրամփն ու նախագահ Պուտինը կարող են պայմանավորվել, թե ինչպես կարգավորել հարաբերությունները ԱՄՆ-ի և Ռուսաստանի միջև և ինչպես խաղաղություն հաստատել Ուկրաինայում»,- հավելել է նախարարը:
Նրա խոսքով, «եթե նրանք կարողանան պայմանավորվել, թե ինչպես կարելի է խաղաղություն հաստատել, ապա խաղաղությունը կարող է վերադառնալ Կենտրոնական Եվրոպա»:
