Պեկինը, Մոսկվան և Թեհրանը հանդես են գալիս բոլոր անօրինական միակողմանի պատժամիջոցների վերացման օգտին։ Այս մասին հայտարարել է ՉԺՀ փոխարտգործնախարար Մա Չժաոսուն՝ Պեկինում իրանական միջուկային խնդրին նվիրված ՌԴ փոխարտգործնախարար Սերգեյ Ռյաբկովի և Իրանի փոխարտգործնախարար Քազեմ Ղարիբաբադիի հետ հանդիպմանը։
«Պարոն Ռյաբկովը, պարոն Ղարիբաբադին և ես մտքերի խորը փոխանակում ունեցանք»,-ասել է Մա Չժաոսուն:
Կողմերը համակարծիք են եղել, որ քաղաքական և դիվանագիտական շփումները, ինչպես նաև շահերի փոխադարձ հարգանքի վրա հիմնված երկխոսությունը մնում են իրավիճակի կարգավորման միակ հնարավոր և գործնական ճանապարհը։
Նրանք նաև ընդգծել են ՄԱԿ-ի Անվտանգության խորհրդի 2231 բանաձևի կիրառման կարևորությունը՝ ի աջակցություն Իրանի միջուկային համաձայնագրի, ներառյալ՝ այնտեղ նշված ժամկետների պահպանումը, և շահագրգիռ կողմերին կոչ արել ձեռնպահ մնալ ցանկացած գործողությունից, որը կարող է հանգեցնել իրավիճակի սրման, այլ պայմաններ և մթնոլորտ ստեղծել դիվանագիտական ջանքերի համար։
