Իտալիայի վարչապետ Ջորջիա Մելոնին տարակուսանք է հայտնել երկուշաբթի օրը Փարիզում Ուկրաինայի հարցով մի շարք եվրոպացի առաջնորդների հանդիպման ձևաչափի առնչությամբ։ Հանդիպումը, նրա կարծիքով, «բացառեց» շատ երկրների, հաղորդում է askanews-ը։
Միևնույն ժամանակ, վարչապետը մասնակցել է հանդիպմանը՝ ուշանալով և հրաժարվելով մեկնաբանություն տալ մինչ դրա սկսվելը, հիշեցնում է գործակալությունը։
Մելոնիի խոսքով, քննարկման համար ավելի հարմար ձևաչափ կլինի Եվրոպական խորհրդի արտակարգ գագաթնաժողովը, որը կապահովի երկրների ավելի լայն ներկայացվածություն։ Սակայն այն դեռ չի գումարվել ԵՄ-ի ներսում առկա տարաձայնությունների պատճառով, մասնավորապես՝ Ռուսաստանի նկատմամբ Հունգարիայի դիրքորոշման պատճառով, գրում է գործակալությունը։
Ուկրաինայում հակամարտության հետևանքները զգում են բոլոր պետությունները, և ոչ միայն նրանք, ովքեր ներկա են եղել հանդիպմանը, նշել է Իտալիայի վարչապետը։ Նա թերահավատություն է հայտնել Ուկրաինա եվրոպական զորքեր ուղարկելու գաղափարի վերաբերյալ՝ հնարավոր հրադադարի հաստատման համար։
Նրա կարծիքով՝ դա կլինի «ամենադժվար» և «ոչ արդյունավետ» լուծումը։ Ըստ Մելոնիի, անհրաժեշտ է ուսումնասիրել այլ տարբերակներ, որոնք ենթադրում են ԱՄՆ ավելի ակտիվ մասնակցություն, քանի որ ՆԱՏՕ-ի համատեքստում է, որ «կառուցվում է եվրոպական և ամերիկյան անվտանգությունը»:
