Աֆղանստանի տեղեկատվության և մշակույթի նախարարությունն արգելել է հեռուստատեսությամբ քաղաքական կամ տնտեսական քննարկումների հեռարձակումը։
Այս մասին հայտնում է Աֆղանստանի լրագրողական կենտրոնը: Կազմակերպության տվյալներով՝ փետրվարի 12-ին լրատվամիջոցների աշխատակիցների և տեղեկատվության ու մշակույթի նախարարության ներկայացուցիչների հանդիպման ժամանակ վերջիններս բանավոր կարգադրել են դադարեցնել հեռուստատեսությամբ ցանկացած քաղաքական կոնտենտի հեռարձակումը։
Նախարարության հրահանգը սահմանում է, որ հեռուստատեսային լրագրողները կկարողանան շփվել միայն գործող վարչակազմի ներկայացուցիչների հետ։Հրամանը տարածվել է նաև տնտեսական քննարկումների վրա, որոնք «մարտահրավեր են նետում գործող կառավարությանը»:
Սահմանափակումները վերաբերում են նաև մասնավոր և անկախ հեռուստաալիքներին։Տեղեկատվության և մշակույթի նախարարությունից հայտնել են նաև, որ այս հրահանգի կատարման հետ կապված կոնկրետ մանրամասներ կպարզվեն մինչև փետրվարի 17-ը։
Նախարարությունից դեռ պաշտոնական մեկնաբանություն չկա՝ արգելքը ժամանակավոր, թե մշտական լինելու վերաբերյալ։
