Դատական ակտով, օրինական ուժի մեջ մտած վճռով հաստատված է, որ ապօրինի ծագում ունեցող գույքի բռնագանձման ինստիտուտը գործում է, և եռաստիճան դատական համակարգում վերջնական օրինական ուժի մեջ մտած վճռով ունենք ամբողջությամբ բավարարված հայց: Այդ մասին Կառավարության՝ փետրվարի 13-ի նիստին ասաց ՀՀ գլխավոր դատախազ Աննա Վարդապետյանը՝ արձագանքելով վարչապետ Նիկոլ Փաշիյնանի այն հարցին, թե արդյոք իրողությո՞ւն է ապօրինի ծագում ունեցող գույքի բռնագանձումը:
«Հակակոռուպցիոն դատարանի՝ 2024 թվականի հուլիսի 15-ի վճռով (խոսքն առաջին ատյանի դատարանի մասին է) գլխավոր դատախազության հայցադիմումն ամբողջությամբ բավարարվել էր, և վճռի հիման վրա (վճիռն օրինական ուժի մեջ մտավ տարեսկզբին) ՀՀ սեփականության իրավունքն է արդեն գրանցվել Երևան քաղաքի Վարդանանց փողոցում գտնվող մեկ բնակարանի և Կոտայքի մարզի Առինջ համայնքում գտնվող 1 բնակելի տան նկատմամբ:
Հօգուտ ՀՀ-ի բռնագանձվել է նաև 50,720 եվրոյին համարժեք շուրջ 22 մլն դրամ:
Վճռի մնացած մասի կատարման նպատակով գլխավոր դատախազությունը դիմել է Հակակոռուպցիոն դատարան՝ խնդրելով տրամադրել կատարողական թերթ, որպեսզի հարկադիր կատարման ծառայության միջոցով մնացածը կատարվի»,- ասաց նա:
Վարդապետյանը տեղեկացրեց՝ մինչ այժմ ապօրինի ծագում ունեցող գույքի բռնագանձման վարույթի շրջանակում վերադարձված գույքերը հաշտություններ են եղել:«Ապօրինի ծագում ունեցող գույքի բռնագանձման մեր գործառույթի շրջանակում այս պահին ներկայացված հայցադիմումների թիվը 136-ն է, որոնք տարբեր ատյանների դատարաններում են:
Հիշեցնենք, որ այդ հայցադիմումներով պահանջում ենք բռնագանձել 270 շարժական, 1381 անշարժ գույք, 359 իրավաբանական անձում մասնակցություն:
Մոտավոր դրամական պահանջն այս պահին կազմում է 527 մլրդ դրամ, ընդհանուր հայցագինը՝ շուրջ 600 մլրդ դրամ»,- ասաց նա՝ հավելելով, որ վերջին թիվը շուկայական և կադաստրային արժեքների հարաբերակցության արդյունքում կփոխվի:Գլխավոր դատախազը խոսեց նաև անցած տարի գործարկված մի մեխանիզմի մասին, այն է՝ վերականգնված միջոցների միասնական հաշիվը:
Ըստ այդմ՝ գործարկման օրվանից՝ դեկտեմբերի 5-ից, մինչ օրս վերականգնված միջոցների միասնական հաշվին մուտքագրվել է շուրջ 10 մլրդ 283 մլն դրամ:«Սա տնտեսական հանցագործությունները չի ներառում:
Այսինքն՝ բոլոր այն հանցագործությունները, որոնք կապված են հարկային պարտավորությունների չկատարման հետ, բոլոր այդ վերականգնումները վճարվելու են ոչ թե այս հաշվեհամարին, այլ համապատասխան հարկ վճարողների համար նախատեսված հաշվեհամարին»,- ասաց նա:
