ԱՄՆ վարչակազմը դեռևս ակնկալում է Գազայի հատվածի վերաբերյալ ԱՄՆ նախագահ Դոնալդ Թրամփի ծրագրին այլընտրանքներ Մերձավոր Արևելքի երկրներից, սակայն նման առաջարկներ դեռ չեն ստացվել։ Այս մասին երկուշաբթի Sirius Satellite Radio-ի եթերում ասել է ԱՄՆ պետքարտուղար Մարկո Ռուբիոն։
Նա նշել է, որ Իսրայելի և պաղեստինյան արմատական ՀԱՄԱՍ շարժման միջև ռազմական գործողությունների արդյունքում Գազայի հատվածը լուրջ վնասներ է կրել, ուստի, այն վերականգնելու համար լուրջ ջանքեր կպահանջվեն։
«Այս պահին միակը, ով ոտքի կանգնեց և ասաց, որ պատրաստ է օգնել այս հարցում, դա Դոնալդ Թրամփն է: Մնացած բոլոր առաջնորդները պետք է քայլեր ձեռնարկեն: Եթե նրանք ավելի լավ գաղափար ունեն, ուրեմն եկել է ժամանակը: Հիմա ժամանակն է, որ տարածաշրջանի մյուս կառավարությունները և այլ ուժերը առաջարկներ ներկայացնեն, սակայն նրանցից ոչ մեկը դա չի անում»,- ասել է Ռուբիոն։
Փետրվարի 4-ին ԱՄՆ նախագահը Սպիտակ տանը բանակցություններից հետո Իսրայելի վարչապետ Բենիամին Նեթանյահուի հետ համատեղ ասուլիսում հայտարարել է, որ Վաշինգտոնը դիտարկում է Գազայի հատվածի երկարաժամկետ սեփականության հարցը՝ այն զարգացնելու համար՝ ի շահ Մերձավոր Արևելքում խաղաղության։
