Էկվադորում կայացած նախագահական ընտրություններում ձայների 80%-ի հաշվարկից հետո չի հաջողվել որոշել առաջին փուլում հաղթողին: Երկրում, ամենայն հավանականությամբ, կանցկացվի քվեարկության երկրորդ փուլ, այդ մասին հաղորդում է The Associated Press գործակալությունը։ Քվեաթերթիկների 80 տոկոսի հաշվարկից հետո գործող նախագահ պահպանողական Դանիել Նոբոան ստացել է ձայների 44,43 տոկոսը, ձախ ուժերի ներկայացուցիչ Լուիսա Գոնսալեսը՝ 44,17 տոկոսը։
Այսպիսով, նրանք, ամենայն հավանականությամբ, կանցնեն երկրորդ փուլ, որը պլանավորված է անցկացնել ապրիլի 13-ին։Քվեարկությանը կարող էր մասնակցել շուրջ 13,7 մլն ընտրող։ Առաջին փուլում մասնակցությունը գերազանցել է 83 տոկոսը։Առաջին փուլին մասնակցել է 16 թեկնածու։
Նրանց բոլորի նախընտրական հիմնական խոստումը դարձել է հանցավորության և նարկոմաֆիայի դեմ պայքարը։ AP-ն հիշեցնում է, որ Նոբոան ժառանգել է բանանի առևտրով վաստակած ընտանեկան կարողությունը: Նա աշխատել է իր հոր Noboa Corp ընկերությունում՝ զբաղվելով ծովային փոխադրումներով, լոգիստիկայով և առևտրով: 2021 թ. դարձել է Ազգային ժողովի անդամ, այնտեղ գլխավորել է տնտեսական զարգացման հանձնաժողովը։Իսկ Գոնսալեսը համարվում է Էկվադորի նախկին նախագահ Ռաֆայել Կոռեայի (պաշտոնավարել է 2007-2017 թթ.) հովանավորյալը։
Նա Կոռեայի օրոք աշխատել է պետական ապարատում՝ զբաղեցնելով տարբեր պաշտոններ. պատգամավոր է եղել 2021-ից մինչև 2023 թվականի մայիսը։
