ՀՀ իշխանությունները քաղաքացիների մեջ պոտենցիալ հանցագործ են տեսնում, մտածում են` մարդիկ հարկ են թաքցնում, ուստի պետք է գնալ համընդհանուր բոյկոտի և չեղարկել հայտարարագրի լրացումը։ «Աբովյան Time» հաղորդման հեղինակ Արման Աբովյանի հետ զրույցում այս տեսակետը հայտնեց «Ապրելու երկիր» կուսակցության համահիմնադիր, ՀՀ աշխատանքի և սոցիալական հարցերի նախկին նախարար Մեսրոպ Առաքելյանը։
Վարձու աշխատող, ինչպես նաև քաղաքացիաիրավական պայմանագրերի շրջանակում հարկվող եկամուտ ստացած քաղաքացիները պետք է հայտարարագիր ներկայացնեին մինչև մայիսի 1–ը։ ՀՀ վարչապետ Նիկոլ Փաշինյանն այսօր հայտարարեց, որ հայտարարագրերի լրացման ժամկետը կերկարացվի մինչև նոյեմբերի 1–ը։
«Այս պահին հայտարարագիր մի՛ լրացրեք, մենք դեռ ժամանակ ունենք ստորագրահավաք կազմակերպելու միջոցով գնալ օրենքի չեղարկման ճանապարհով` ցույց տալով մեր բոյկոտը»,–ասաց Առաքելյանը։
Նրա խոսքով` ՀՀ իշխանությունները տնտեսական տարրական գիտելիքների չեն տիրապետում, հակառակ դեպքում նման քայլի չէին գնա։ Որովհետև եթե իրենց նպատակը շատ հարկ հավաքելն է, ապա այս տարբերակով դա հնարավոր չի լինի անել։
«Սա ազգային անվտանգության խնդիր է։ Չի կարելի այս կիսագրագետներին բերել ու կապել ազգի ջանին, հիմա էլ` տնտեսական մասով։ Եվ դա վիրավորանք չէ։ Օրինակ` ես էլ քիմիական գիտելիքներ չունեմ, բայց չեմ աշխատում Քիմիայի ինստիտուտում, բարձր պաշտոն չեմ զբաղեցնում։ 2.3 մլն մարդու բերել, մտցնել մի համակարգի մեջ, երբ հասարակության 25%-ն աղքատ է, և նրանց եկամուտը չի գերազանցում ամսական 40.000 դրամը, խելամիտ չէ։ Իրենք բոլորից լավ գիտեն թալանչիներին, այսօր իրենց հետ լավ էլ համագործակցում են, գնացեք, բռնեք այդ մարդկանց, ի՞նչ եք ընկել այս ժողովրդի ջանին»,–ասաց նա։
Շարունակությունը՝ սկզբնաղբյուր կայքում։
