Քննչական կոմիտեի նախագահի նախկին մամուլի քարտուղար Գոռ Աբրահամյանի ֆեյսբուքյան գրառումը․
«Հունվարի 30-ին Հայաստան է ժամանում Վրաստանի վարչապետ Իրակլի Կոբախիձեի գլխավորած պատվիրակությունը։ Հայտնում է ՀՀ կառավարությունը։ Իսկ ընդամենը ժամեր առաջ ՀՀ ԱԳՆ-ն տեղեկացրել էր, որ նույն օրը աշխատանքային այցով Հայաստան է ժամանում Վրաստանի արտաքին գործերի նախարար Մակա Բոճորիշվիլին։ Ներկայացվել էին նաև մանրամասներ այցի օրակարգից։
Վրաստանից փաստացի նույն օր երկու այց է տեղի ունենում Հայաստան։ Սա նուրբ հանգամանք է՝ հատկապես նկատի ունենալով, որ Կոբախիձեն, Վրաստանում խորհրդարանական ընտրությունների արդյունքում նոր կառավարության ձևավորումից և երկրի վարչապետի պաշտոնն զբաղեցնելուց հետո առաջին այցը կատարել էր Ադրբեջան՝ հունվարի 17-ին․ այսինքն Վաշինգտոնում Հայաստանի արտգորշնախարար Միրզոյանի ու ԱՄՆ հեռացող վարչակարգի պետքարտուղար Բլինքենի կողմից ԱՄՆ-Հայաստան ստրատեգիական համագործակցության կանոնադրությունը ստորագրելուց երկու օր անց։
Ըստ էության՝ Հայաստան կատարվող այցը ևս բարձր մակարդակ ունի, ինչով պաշտոնական Թբիլիսին ուզում է ընդգծել հարևան երկու երկրների հետ հարաբերությունների կարգավիճակային ընդհանուր հարթությունում գտնվելու հանգամանքը։
Այդուհանդերձ, Վրաստանում նոր կառավարության ղեկավարի կողմից առաջինը Բաքու այցելելու հանգամանքը որոշակիացնում է Թբիլիսիի տարածաշրջանային նախապատվությունները։ Եվ սա ոչ անակնկալ ազդակ է Երևանի համար։
Դա ամենևին չպետք է խանգարի Երևանին ու Թբիլիսիին՝ քննարկելու ակտուալ տարածաշրջանային և գուցե ավելի գլոբար հարցեր, որոնք կապված են մինչ այս տեղի ունեցած և շարունակվող կարևոր վեկտորային տեղաշարժերով։
Գուցե Կոբախիձեն նաև Բաքվից իր հետ որոշակի առաջարկներ կամ ուղերձնե՞ր է բերում Երևան․․․
