Ռուսաստանի Դաշնության մայրաքաղաքում տեղի են ունեցել Հայաստանի և Ռուսաստանի արտգործնախարարների բարձր մակարդակի բանակցությունները, որի ընթացքում կողմերը քննարկել են հայ-ռուսական ողջ օրակարգին առնչվող կարևորագույն թեմաները:
Մոսկվայից ժամանակավորապես երես թեքած պաշտոնական Երևանը կրկին հայացքն ուղղում է դեպի հյուսիս՝ հիշելով իր ռազմավարական դաշնակցի հետ հարաբերությունների մասին: Հավաքական Արևմուտքի՝ Եվրամիության և Միացյալ Նահանգների հետ հարաբերությունների խորացմանն ուղղված այս ամսվա նշանակալի մի քանի քայլերից հետո Փաշինյանի կառավարությունը շտապում է բալանսավորել Հայաստանի արտաքին քաղաքականության վեկտորները և կարգավորել Ռուսաստանի հետ բարդ հարաբերությունները:
Այն, որ այդ հարաբերությունները բարդ են, ոչ թե մեր սուբյեկտիվ գնահատականն է, այլ Ռուսաստանի արտգործնախարարի՝ պաշտոնական բարձր մակարդակով տված բնորոշումը: Թեև, մեծ հաշվով, հայ-ռուսական երբեմնի ռազմավարական ու եղբայրական հարաբերությունների վատթարացումը վերջին տարիներին ակնհայտ է դարձել բոլորին: Ամբողջ հարցն այն է, թե կողմերից ո՞վ է շահագրգռված դրանց փրկությամբ: Համենայն դեպս, հայկական կողմից գոնե արտաքնապես տեսնում ենք որոշ քայլեր այդ ուղղությամբ:
Նախ, Նիկոլ Փաշինյանն իր նախաձեռնությամբ զանգահարեց Ռուսաստանի նախագահին և պարզաբանումներ տվեց Վլադիմիր Պուտինին Եվրամիության հետ հարաբերությունների ոլորտում Երևանի ձեռնարկած քայլերի վերաբերյալ: Ապա արտգործնախարար Արարատ Միրզոյանը, ընդունելով ռուսական կողմի հրավերը, շտապեց Մոսկվա՝ իր ռուսաստանցի գործընկերոջ հետ հանդիպման:
Երեկ՝ հունվարի 21-ին, Մոսկվայում տեղի է ունեցել Արարատ Միրզոյանի և Սերգեյ Լավրովի ընդլայնված կազմով հանդիպումը, ապա՝ առանձնազրույցը, որի ընթացքում արտգործնախարարները քննարկել են հայ-ռուսական հարաբերությունները, ԵԱՏՄ-ին, տարածաշրջանին և համաշխարհային օրակարգին առնչվող մի շարք հարցեր:
Մանրամասները՝ տեսանյութում:
Հեղինակ՝ Արամ Սարգսյան
