Պանամայի ղեկավարությունը նամակ է հղել ՄԱԿ-ի գլխավոր քարտուղար Անտոնիու Գուտերեշին, որտեղ հայտնում է, որ չի ընդունում Պանամայի ջրանցքի պատկանելության հարցի և այն ԱՄՆ-ի վերահսկողությանը վերադարձնելու մտադրության մասին ԱՄՆ նախագահ Դոնալդ Թրամփի հայտարարությունները, այս մասին հայտնում է Պանամայի արտաքին գործերի նախարարությունը։«Պանաման նամակ է հղել նախագահ Դոնալդ Թրամփի երդմնակալության ելույթի ժամանակ նրա արած հայտարարությունների առնչությամբ, երբ նա խոստացավ, որ ԱՄՆ-ն կվերադարձնի Պանամայի ջրանցքը:
Նյու Յորքում ՄԱԿ-ում Պանամայի դեսպան Էլոյ Ալֆարո դե Ալբան կազմակերպության գլխավոր քարտուղար Անտոնիու Գուտերեշին հասցեագրված նամակում հիշեցրել է, որ ՄԱԿ-ի Կանոնադրության համաձայն՝ երկրները պետք է իրենց հարաբերություններում ձեռնպահ մնան ուժի սպառնալիքից կամ դրա կիրառումից ցանկացած պետության տարածքային ամբողջականության կամ քաղաքական անկախության դեմ», - ասված է գերատեսչության հայտարարության մեջ։ Հունվարի 20-ին Թրամփը, երդմնակալության խոսքով ելույթ ունենալով ԱՄՆ Կոնգրեսի կենտրոնական դահլիճում՝ Ռոտոնդայում, կրկին հայտարարել է Պանամայի ջրանցքը «հետ վերցնելու» մտադրության մասին։
Նա պնդել է, որ ջրանցքի վերահսկողությունը Պանամային վերադարձնելը «անմիտ նվեր էր, որը պետք չէր անել»: Թրամփի կարծիքով՝ «Չինաստանն է կառավարում Պանամայի ջրանցքը»։
