Թբիլիսիում Վրաստանի խորհրդարանի մոտ հակակառավարական հերթական բողոքի ակցիան է ընթանում։ Ցուցարարները փակել են Ռուսթավելի պողոտայի երթևեկությունը, որտեղ գտնվում է խորհրդարանի շենքը։
Ցուցարարների պահանջը մնում է անփոփոխ՝ ազատ արձակել նախկինում կալանավորված ակտիվիստներին և նշանակել նոր խորհրդարանական ընտրություններ։ Նրանք նաև համերաշխություն են հայտնում տեղական «Բաթումելեբի» առցանց լրատվականի ղեկավար Մզիա Ամագլոբելիին, ով ձերբակալվել էր հունվարի 12-ին Բաթումում տեղի ունեցած ցույցի ժամանակ և ենթարկվում է քրեական պատասխանատվության՝ ոստիկանին ապտակելու համար։
Բողոքի ցույցերը Թբիլիսիում սկսվել են նոյեմբերի 28-ին, երբ վարչապետ Իրակլի Կոբախիձեն հայտարարեց, որ երկրի իշխանություններն իրենց հերթին սառեցնում են Եվրոմիությանն անդամակցելու շուրջ բանակցությունների բացման գործընթացը։
Բողոքի առաջին շաբաթն ամենաբուռնն էր, հետո բողոքի ակցիաները խաղաղ բնույթ ստացան, դրանք ամեն օր տեղի են ունենում խորհրդարանի շենքի մոտ և ավարտվում կեսգիշերին մոտ՝ քաղաքացիները ինքնակամ լքում են Ռուսթավելի պողոտան։
