Սերժ Սարգսյանը հայտնել է, որ կգա հյուր «Իմնեմնիմի» փոդքասթին: Այս մասին իր ֆեյսբուքյան էջում գրել է «Իմնեմնիմի» փոդքասթի համահեղինակ Վազգեն Սաղաթելյանը:
«Երեկվա «Իմնեմնիմի»-ի ժամանակ, ինչպես միշտ, առաջին կես ժամը զրուցում էինք մեր լսարանի հետ հարց-պատասխան ձևաչափում և հնչեց մի քանի հարց, որոնք վերաբերում էին նախագահ Սերժ Սարգսյանին: Պատասխանելուց հետո ես նշեցի, որ անկեղծ հույս ունեմ, որ մի օր մենք կունենանք հնարավորություն հյուրընկալել նախագահին։ Արդեն անցել էինք այլ թեմաների, մեկ էլ տեսնեմ՝ Նարեկը «վոյս» է լսում: Այն, ինչ եղավ հետո, ինչպես ասում են, շատ հուզիչ էր։
Պարզվեց՝ նախագահ Սարգսյանը դիտում էր եթերը ու, արձագանքելով մեր զրույցին, հայտնեց, որ ինքը կգա հյուր «Իմնեմնիմի» փոդքասթին։ Նույն հաղորդագրության մեջ ասվում էր, որ ճիշտ ժամանակը դա անելու՝ կընտրի ինքը։
Ես անկեղծ շատ ուրախ եմ, որ ունենալու ենք նման աննախադեպ հնարավորություն, քանի որ նախագահի հետ իմ շփումների ժամանակ միշտ ափսոսացել եմ, որ դա փոդքասթի շրջանակներում չէ, ու անչափ հետաքրքիր տեղեկությունը, տեսակետները, որոնք հնչում են այդ մասնավոր զրույցներում, չեն հանրայնացվում։ Դե ինչ, վստահաբար՝ շատ հետաքրիքր եթեր է սպասվում մեզ, ընկերներ, իրոք անչափ ուրախ եմ ու շնորհակալ նախագահին՝ նման արձագանքի համար»,- գրել է նա։
