Ադրբեջանի արտաքին գործերի նախարար Ջեյհուն Բայրամովը տեղեկացրել է Թուրքիայի արտաքին գործերի նախարար Հաքան Ֆիդանին Հայաստանի հետ սահմանազատման գործընթացի մասին։ Ինչպես տեղեկացնում է «Արմենպրես»-ը, վկայակոչելով ադրբեջանական լրատվամիջոցները, այս մասին Բայրամովը հայտարարել է Ֆիդանի հետ հանդիպումից հետո տեղի ունեցած մամուլի ասուլիսի ժամանակ։
«Մենք քննարկել ենք իրավիճակը հետկոնֆլիկտային շրջանում։ Թուրք գործընկերոջը տեղեկացրել եմ սահմանազատման գործընթացի հետագա գործողությունների մասին»,- ասել է Բայրամովը։
Ինչպես արդեն հայտնել ենք՝ Թուրքիայի արտաքին գործերի նախարար Հաքան Ֆիդանը աշխատանքային այցով մեկնել է Ադրբեջան, որտեղ հանդիպում է ունեցել Ադրբեջանի նախագահ Իլհամ Ալիևի հետ։
Այցի շրջանակներում կայացել է նաև Ֆիդանի հանդիպումը Ադրբեջանի արտաքին գործերի նախարար Ջեյհուն Բայրամովի հետ։
