Հնդկաստանը և Ռուսաստանը պայմանավորվում են Ռուսաստանի նախագահ Վլադիմիր Պուտինի՝ Նյու Դելի այցի ժամկետների շուրջ, որտեղ 2025 թվականին տեղի կունենա ռուս-հնդկական ավանդական ամենամյա գագաթնաժողովը։ Այս մասին ճեպազրույցում հայտարարել է Հնդկաստանի ԱԳՆ պաշտոնական ներկայացուցիչ Ռանդհիր Ջեյսվալը։
«Ինչ վերաբերում է Ռուսաստանի նախագահ Վլադիմիր Պուտինի այցին, այո, այս տարի ամենամյա գագաթնաժողովը կանցկացվի Հնդկաստանում»,- հիշեցրել է նա։
«Այցի ժամկետները համաձայնեցվում են դիվանագիտական ուղիներով», - ասել է Ջեյսվալը:
2024 թվականի նոյեմբերի 19-ին Ռուսաստանի ղեկավարի մամուլի քարտուղար Դմիտրի Պեսկովը հայտարարեց, որ Պուտինը կայցելի Հնդկաստան, Մոսկվան և Նյու Դելին կսկսեն ուղևորության նախապատրաստությունը։ Նա հիշեցրել է, որ 2024 թվականին Հնդկաստանի վարչապետը երկու անգամ այցելել է Ռուսաստանի Դաշնություն։
Մոդին 2024 թվականի հուլիսին երկօրյա այցով եղել է Մոսկվայում, որի ընթացքում կայացել է ռուս-հնդկական 22-րդ գագաթնաժողովը։ Հոկտեմբերին նա այցելել է Կազան՝ մասնակցելու BRICS-ի գագաթնաժողովին։
