Եվրոպան ստիպված կլինի ավելին անել Ուկրաինային օգնելու համար այն բանից հետո, երբ հունվարի 20-ին ԱՄՆ նորընտիր նախագահ Դոնալդ Թրամփը վերադառնա Սպիտակ տուն: Այսպիսի հայտարարություն է արել Միացյալ Թագավորության վարչապետ Քիր Սթարմերը։
«Այո, կարծում եմ, միասին իսկապես պետք է ավելին անենք Ուկրաինայի համար, կարծում եմ, որ դա իրականացվում է ողջ Եվրոպայում», - ասել է կառավարության ղեկավարը «Politico» եվրոպական հրատարակությանը տված հարցազրույցում:
«Ես միանգամայն վստահ եմ, որ նորընտիր նախագահ Թրամփը հստակ հասկանում է Միացյալ Նահանգների կարևոր դերը հակամարտությունը լուծելու հարցում», - ասել է Սթարմերը՝ հավելելով, որ Լոնդոնն ամեն օր աշխատում է Վաշինգտոնի հետ այս հարցի շուրջ և կշարունակի դա անել։
Վարչապետը նաև կրկնել է, որ Բրիտանիան մտադիր է «ամբողջական դեր» խաղալ հակամարտությունը կարգավորելու ցանկացած հնարավոր նախաձեռնության մեջ, այդ թվում՝ Ուկրաինա խաղաղապահներ ուղարկելու դեպքում։
