«Հրապարակը» գրում է․
«Հակակոռուպցիոն կոմիտեում խիստ գաղտնիության շղարշի տակ քննվում է քրեական գործ, որն առնչվում է ՊՆ կապիտալ շինարարության եւ զորքերի բնակավորման վարչությունում տեղի ունեցած առերեւույթ չարաշահումներին։ Այս մասին գրել էինք դեռևս տարեվերջին, սակայն քննչական մարմիններից պաշտոնական հաստատում չէինք ստացել։ Այսօր վերջապես կոմիտեից հաստատեցին, որ կա նման գործ։ «Կա նման գործ կոմիտեի վարույթում, կան մեղադրյալներ և կալանավորված անձինք։ Մանրամասները կհրապարակվեն նախաքննության ավարտից հետո»,- ասված է Հակակոռուպցիոն կոմիտեի պատասխանում։
Մեր ճշգրիտ, բայց ոչ պաշտոնական տվյալներով, կապշինվարչության գործով ներգրավված է 7 մեղադրյալ, որոնց թվում կան վարչության աշխատողներ։ Մեղադրյալներից 5-6 հոգի կալանավորված է։ Նրանց մի մասը տնային կալանքի տակ է։ Արդյունքում այս պահին ՊՆ կապիտալ շինարարության վարչության աշխատանքը պարալիզված է։ Վարչության պետի պաշտոնակատար Վահագն Ստեփանյանը, որը ժամանակին Պապիկյանի մտերիմներից էր, չի ներկայանում աշխատանքի։ Ամենայն հավանականությամբ, հենց նրան են մեղավոր կարգելու կոռուպցիոն հանցանքների համար։ ՊՆ-ից «Հրապարակի» հարցմանը պատասխանում են․ «Այլ աշխատանքի անցնելու կապակցությամբ, սեփական դիմումի համաձայն, ազատվել է զբաղեցրած պաշտոնից»։
Առհասարակ, սա լիովին համապատասխանում է Պնախարար Սուրեն Պապիկյանի ղեկավարման ոճին։ Եթե իր ամենամերձավորներին կարող է փրկել, ապա նրանց փոխարեն պատասխան են տալիս այլոք՝ երրորդական, չորրորդական կարգի մարդիկ։ Այսպես եղավ թիկնազորի պետի հետ։
Սկանդալային միջադեպը, որը երկար ժամանակ թաքցվում էր, ու որի մասին նախարարության միջանցքներում խոսում են, տեղի է ունեցել սեպտեմբերին, նախարար Պապիկյանի՝ Չինաստան այցի շրջանակում։ Վերադառնալիս, ինքնաթիռում նախարարի թիկնազորի պետը վիրավորում է ուղեկցորդուհուն, կոպիտ ասած՝ փորձում է նրան «ձեռք գցել»։ Կինը բողոքում է, աղմուկ է բարձրանում։ Պապիկյանի թիկնազորի պետը փորձում է «շուռ տալ» դեպքերը, համոզել, որ նույն ինքնաթիռի սրահում ներկա գտնված լուսանկարիչ Ս․ Գ․-ն իր վրա վերցնի «ախրաննիկի» մեղքը։ Սակայն երիտասարդը հրաժարվում է, ասելով՝ գլխիս ինչո՞ւ եք սարքում, դուք եք արել, դուք էլ պատասխան տվեք, և իր հերթին է աղմուկ բարձրացնում, բողոքում ու պայքարում։ Այս ամենից հետո նախարարը, ստիպված, իր անվտանգության ծառայության պետին ուղարկում է հետ՝ պետական պահպանության ծառայություն, բայց լուսանկարչի բողոքավոր կեցվածքը, աղմուկ բարձրացնելը չի կարողանում մարսել։ Ամանորից առաջ լուսանկարչի հաստիքը կրճատում են՝ Ս․ Գ․-ին ազատելով աշխատանքից։
Մենք փորձեցինք միջադեպի կապակցությամբ ՊՆ խոսնակ Արամ Թորոսյանի պարզաբանումները ստանալ։ Նա ասաց, որ տեղյակ չէ նման դեպքի մասին։
«Նման միջադեպի մասին տեղեկություն չունեմ։ «Զինուժ մեդիա»-ում ընթանում են կառուցվածքային փոփոխություններ, օպտիմալացման, աշխատանքներն առավել արդյունավետ իրականացնելու շրջանակում: «Զինուժ մեդիայում» ընթացող բարեփոխումները որևէ միջադեպով պայմանավորված չեն, միայն լուսանկարչի հաստիքը չէ, որ կրճատվել է. կառուցվածքային փոփոխությունների վերաբերյալ այլ մանրամասներ հաղորդելն այս պահին համարում եմ ոչ նպատակահարմար։ Պաշտպանության նախարարի անվտանգությունն ապահովում է Պետական պահպանության ծառայությունը»,- ասաց նա։ Հարցին, թե քանի մարդ է կալանավորված կապշինվարչության աշխատողներից ու աշխատանքի չի ներկայանում, նա պատասխանեց․ «Նշված տեղեկատվությունն ստանալու համար անհրաժեշտ է դիմել վարույթն իրականացնող մարմնին»:
Այստեղ տեղին է հիշեցնել, որ մեկ տարի առաջ, երբ Ազատ գյուղի զորանոցում հրդեհ բռնկվեց, եւ զոհվեցին 15 զինծառայողներ, Պապիկյանը մեղադրեց երկրորդ բանակային կորպուսի հրամանատարությանը։ Դեպքից անմիջապես հետո պաշտոններից ազատվեցին 2-րդ բանակային կորպուսի հրամանատարը ու ևս 7 բարձրաստիճան զինվորականներ: Այն ժամանակ կապշինվարչության պետը, որը նրա մերձավորներից է, Պապիկյանի ամենամոտ մարդկանցից՝ նախարարությունում, խուսափեց պատասխանատվությունից։ Բայց պարզվում է, որ Ազատի ողբերգությունից առաջ կորպուսի ղեկավարությունից, զորամասից բազմիցս գրություններ են գնացել ՊՆ կապիտալ շինարարության եւ զորքերի բնակավորման վարչություն, որոնց միջոցով բանակայինները տեղյակ են պահել ՊՆ պաշտոնյաներին, որ զորքի բնակկենցաղային պայմանները շատ վատն են, խնդրել են տնակներ կառուցել, մոդուլներ, մի բան անել, քանի որ զորքն ամբողջությամբ ցրված է տների մեջ։ Այդ տներից ոչ մեկը նորմալ կահավորված չէ, ո՛չ հակահրդեհային անվտանգության, ո՛չ տաքություն ապահովելու տեսանկյունից չի համապատասխանում ստանդարտներին եւ ոչ մի նախապայմանի, որ այդ շենքերը հասարակ գյուղի տներ են։ Սակայն կապշինվարչությունը, Սուրեն Պապիկյանը չարձագանքեցին զինվորականների պահանջներին և միայն ողբերգությունից հետո սկսեցին թոզ փչել հանրության աչքերին՝ ցուցադրելով ինչ-որ մոդուլային տնակներ, որոնք ՊՆ-ն սարքում է։ Այսօր արդեն կապշինվարչության հերթն է՝ քավության նոխազ դառնալու։ Տարբերակ չկա, և հակակոռուպցիոն գիլյոտինը մոտենում է Պապիկյանին, և փուռն են տալիս արդեն մերձավորներին։ Չէ՞ որ ՊՆ գլխավոր սկզբունքն է՝ բոլորը մեղավոր են, բացի նախարարից»։
