Նիկոլ Փաշինյանի համաձայնությունը Արցախի հիմնախնդրի կարգավորմամբ զբաղվող ԵԱՀԿ Մինսկի խումբը լուծարելու Ադրբեջանի առաջարկին խիստ բացասական գնահատականի է արժանացել Հայաստանի քաղաքական դաշտում և փորձագիտական հանրության շրջանում:
Երկար տարիներ Արցախյան հիմնահարցի ուսումնասիրությամբ զբաղվող փորձագետներն ահազանգում են, որ Մինսկի խմբի լուծարմամբ Փաշինյանը փաստորեն համաձայնություն է տալիս Լեռնային Ղարաբաղի հարցը Ադրբեջանի օգտին լուծելու օրինականացմանը և հարցը վերջնականապես փակելուն:
«ՀայաՔվե» նախաձեռնության անդամ, պատմական գիտությունների թեկնածու, դոցենտ Մենուա Սողոմոնյանն էլ ասում է, որ Փաշինյանն իրավասու չէ Արցախի հայ բնակչության ինքնորոշման իրավունքը ճանաչած միջազգային միակ ձևաչափի լուծարման առաջարկով հանդես գալու կամ դրան համաձայնելու:
Euromedia24-ի հետ զրույցում նա գործող վարչապետի այս որոշումը գնահատեց որպես հանցագործություն Արցախի 150 հազար հայ բնակչության դեմ:
Մենուա Սողոմոնյան. «Նա իրավասու չէ հանդես գալու այդպիսի առաջարկով՝ լուծարել ԵԱՀԿ Մինսկի խումբը, Մինսկի գործընթացը, նրա գործունեությունն ուղիղ ձևով առնչվում է Արցախի 150 հազար մարդու ճակատագրին, նրանց ինքնորոշման իրավունքին՝ որպես հավաքականություն, և այս պարագայում նրանց ինքնորոշման իրավունքի վրա խաչ քաշելը՝ չներկայացնելով այդ ժողովրդին, չեմ կարող իրավական տերմինով գնահատական տալ, բայց քաղաքական գնահատականը հանցագործություն է»:
Մանրամասները՝ տեսանյութում
Հեղինակ՝ Արամ Սարգսյան
