ԱՄՆ նախագահ Ջո Բայդենի հեռացող վարչակազմը հաստատել է տեղական արտադրության կիսահաղորդիչների և արհեստական բանականության տեխնոլոգիաների արտահանման կանոնները՝ միևնույն ժամանակ հայտարարելով այդ տեխնոլոգիաների տարածման սահմանափակումների մասին, այս մասին ասվում է Սպիտակ տան մամուլի ծառայության տարածած հաղորդագրության մեջ։
Ինչպես հետևում է փաստաթղթից, Վաշինգտոնի ղեկավարությունը կարծում է, որ «արհեստական բանականությունն արագորեն դառնում է անվտանգության և տնտեսական հզորության առանցքային» գործոն։ «Միացյալ Նահանգները պետք է վճռականորեն գործի այս անցումային փուլում առաջատար դիրք գրավելու համար և ապահովի, որ ամերիկյան տեխնոլոգիաները հիմք հանդիսանան ԱԲ-ի օգտագործման համար ամբողջ աշխարհում, և որ հակառակորդները չկարողանան հեշտությամբ չարաշահել առաջադեմ ԱԲ-ն», - ասվում է Սպիտակ տան տարածած հաղորդագրության մեջ:
Նշվում է, որ սխալ ձեռքերում հայտնվելու դեպքում հզոր ԱԲ համակարգերը կարող են ազգային անվտանգության համար զգալի վտանգներ պարունակել, այդ թվում՝ հնարավոր դարձնելով զանգվածային ոչնչացման զենքերի մշակումը, հարձակողական կիբեր գործողություններին աջակցությունը և մարդու իրավունքների չարաշահումներին նպաստումը, օրինակ՝ զանգվածային հսկողությունը։ Նոր կանոնակարգի համաձայն՝ ԱՄՆ-ն կարող է կիսահաղորդիչներ և ԱԲ տեխնոլոգիաներ մատակարարել 18 դաշնակից և գործընկեր երկրների՝ առանց որևէ սահմանափակումների։
Սահմանափակումները չեն տարածվում նաև այդ երկրներում գտնվող մասնավոր ընկերությունների և կազմակերպությունների վրա, որոնք բավարարում են անվտանգության պահանջները: Բացի այդ, Վաշինգտոնը սահմանում է ԱԲ ոլորտում տեխնոլոգիաների մատակարարման քվոտա և համապատասխան լիցենզիա ստանալու պահանջ ընկերությունների և կազմակերպությունների համար, որոնք տեղակայված են դաշնակից և գործընկեր պետություններից դուրս, բայց ոչ այն երկրներում, որոնք Միացյալ Նահանգները դասակարգում է որպես «մտահոգիչ»:
«Մտահոգիչ» երկրների հետ կապված՝ Միացյալ Նահանգները սահմանափակումներ է մտցնում արհեստական բանականության առաջադեմ համակարգերի փոխանցման համար։ Բացի այդ, հաստատվում է այդ երկրներ առաջադեմ չիպերի մատակարարումների գործող արգելքը։ ԱՄՆ-ն նման երկրների շարքին է դասում Ռուսաստանը, Չինաստանը, Բելառուսը, Հյուսիսային Կորեան, ինչպես նաև Աֆղանստանը, Վենեսուելան, Հայիթին, Զիմբաբվեն, Իրանը, Իրաքը, Կամբոջան, Կուբան, Լիբանանը, Լիբիան, Մյանման, Նիկարագուան, Սիրիան, Սոմալին, Կենտրոնական Աֆրիկյան Հանրապետությունը, Էրիթրեան, Հարավային Սուդանը։
