Սիրիայի ՆԳՆ-ը, որը գործում է անցումային կառավարության շրջանակներում, կոչ է արել գահընկեց արված նախագահ Բաշար ալ-Ասադի վարչակարգի անդամներին անհապաղ հանձնել իրենց զենքերը իրավասու մարմիններին։
«Որպես ամբողջ երկրում անվտանգության և կայունության ապահովման մեր շարունակական ջանքերի մաս, մենք կոչ ենք անում նախկին ռեժիմի անդամներին կամ տարբեր տարածքներում տապալված ռեժիմից մնացած զենքեր հայտնաբերած քաղաքացիներին անհապաղ հանձնել այդ զենքերը իրավասու մարմիններին»: SANA-ն մեջբերում է գերատեսչության հայտարարությունը:
Անցումային կառավարությունում ՆԳՆ ղեկավար Մուհամմեդ Աբդել Ռահմանի խոսքով՝ իշխանությունները ժամկետ են սահմանել նախկին ռեժիմի անդամների և բնակչության ձեռքին զենքերը հանձնելու համար։
«Եթե զենքերը չհանձնվեն մարմիններին մինչև նշված ժամկետի ավարտը, իրավասու մարմինները զսպող իրավական միջոցներ կձեռնարկեն զենք ունեցողների նկատմամբ»,- հավելել է նա։ Հաղորդագրության մեջ ոչ մի ժամկետ չի նշվում:
Նախարարն ընդգծել է, որ կառավարության քայլերն իրականացվում են «ազգային անվտանգության ամրապնդման և քաղաքացիների, ինչպես նաև պետական ու մասնավոր սեփականության անվտանգության պահպանման շրջանակներում»։ Նա կոչ է արել քաղաքացիներին «կատարել իշխանությունների ցուցումները և հրահանգները՝ օրինական պատասխանատվության ենթարկելու համար»։
