ԱՄՆ պետքարտուղար Էնթոնի Բլինքենը հայտարարել է Ուկրաինային 500 մլն դոլարի լրացուցիչ ռազմական օգնություն հատկացնելու մասին։
Այս մասին հաղորդագրություն է տարածել Պետքարտուղարութան մամուլի ծառայությունը։ «Սեպտեմբերի 26-ին (ԱՄՆ) նախագահ Բայդենի հայտարարած անվտանգության աջակցության մեծացման շրջանակներում Միացյալ Նահանգները տրամադրում է հրատապ անհրաժեշտ սպառազինության և տեխնիկայի ևս մեկ զգալի փաթեթ մեր ուկրաինացի գործընկերներին, որոնք պաշտպանվում են Ռուսաստանի շարունակվող հարձակումներից», - ասվում է Բլինքենի հայտարարության մեջ:
Ըստ պետքարտուղարի՝ 500 միլիոն դոլարի լրացուցիչ օգնությունը տրամադրվում է Պաշտպանության նախարարության պահեստներից: Օգնության նոր փաթեթն, ըստ հաղորդագրության, ներառում է հակադրոնային զինամթերք, HIMARS համազարկային կրակի ռեակտիվ համակարգերի զինամթերք, 155 մմ և 105 մմ տրամաչափի հրետանային զինամթերք, արագընթաց հակառադարային հրթիռներ, անօդաչու թռչող սարքեր, ականակայուն մեքենաներ, մեծ շարժունակությամբ փոխադրամիջոցներ, թեթև մարտավարական փոխադրամիջոցներ, կենսաբանական, քիմիական, ճառագայթային և միջուկային զենքից պաշտպանության սարքավորումներ, Javelin և AT-4 համակարգեր, փոքր զինամթերք, նռնակներ, ուսումնական սարքավորումներ, ինչպես նաև պահեստամասեր, օժանդակ սարքավորումներ և այլն:
Ավելի վաղ Սպիտակ տան ռազմավարական հաղորդակցությունների հարցով համակարգող Ջոն Քիրբին ճեպազրույցում ասել էր, որ ԱՄՆ նախագահ Ջո Բայդենը դեկտեմբերի 12-ին հավանություն է տվել Ուկրաինային ռազմական օգնության նոր փաթեթի հատկացմանը։
