2025թ հունվարի 1-ից ուժի մեջ կմտնեն շրջանառության հարկերի հետ կապված օրենսդրական փոփոխություններ։
Շրջանառության հարկերի խնդիրը մի փոքր բազմաշերտ է։ Կառավարությունը հարկահավաքության հետ խնդիր ունի այս պահին։ Վերջին երեք եռամսյակի կտրածքով նախատեսվածից 8 և ավելի տոկոս քիչ հարկ է հավաքագրվել։
Սա սխալ հարկաբյուջետային քաղաքականության արդյունքն է, Euromedia24.COM-ի հետ զրույցում նշեց՝ «Ամբերդ» հետազոտական կենտրոնի փորձագետ Աղասի Թավադյանը։
Նրա խոսքով՝ վերջին 20 տարվա ընթացքում սա առաջին դեպքն է, երբ հարկերը նախատեսվածից ավելի քիչ են վճարվել։
«ՀՀ տնտեսությունը այս պահին վատ վիճակում է, որի մասին փաստում է մի քանի ցուցանիշ։
Դրանցից մեկը հարկերի բավականին զգալի թերհավաքագրումն է, մյուսը՝ արտահանման կրճատումը՝ 2023 թվականի առաջին ամիսների համեմատ մեր հիմնական գործընկերներ և դեպի ԵԱՏՄ երկրներ արտահանումը կրճատվել է 17% , դեպի ԵՄ 25 %:
Կրճատվել է նաև գրանցված կազմակերպությունների քանակը, ինչպես նաև ՏՏ ոլորտը, որը համարվում է ռազմավարական ոլորտ» - նշեց Թավադյանը։
Այս պարագայում հարկերի հավելյալ բարձրացումը, ըստ տնտեսագետի կարող է բերել հակառակ արդյունքի՝ հարկերի քչացման։ Այսինքն, երբ հարկահավաքությունը 0% է, բյուջե 0% հարկ է մտնում, սակայն նույնը կարող է ստացվել 100% -ի դեպքում, քանի որ մարդիկ չեն ցանկանա հարկ վճարել կամ գործունեություն սկսել։
«Սրա հետևանքով լինելու է գնաճ։ Օրինակ, եթե ինչ-որ խանութ 5%-ով էր աշխատում, հունվարի 1-ից աշխատելու է 10%-ով և ստիպված գները բարձրացնելու է» - տեղեկացրեց Թավադյանը
