Արտաշատի ԲԿ-ի բուժաշխատողների աշխատավարձերի պարտքը մասնակի մարելու համար , պարզվում է, պետությունը վարկ է վերցրել։
Այս մասին EUROMEDIA24.com-ի հետ զրույցում նշեց՝ «Առողջության իրավունք» ՀԿ ղեկավար Անուշ Պողոսյանը։
Հիշեցնենք, վերջին 4-5 ամիսների կուտակած աշխատավարձերի պարտք ուներ Արտաշատի ԲԿ-ն , որի մասին վստահաբար իմացել և խնդիրը կոծկած է պահել Արարատի մարզպետը, որպես վերադաս ու միայն բուժաշխատողների անանուն բողոքներից հետո պայթեց իրավիճակը, իսկ որպես հետևանք՝ տնօրեն Հայկ Համբարձումյանն իր դիմումի համաձայն ազատվեց աշխատանքից։
Հայկ Համբարձումյանի հեռանալուց հետո կառավարությունը փոխարինող տնօրեն է նշանակել Մասիսի բկ-ի գլխավոր բժշկին։
«Ինչու՞ եք բերել Մասիսի գլխավոր բժշկին և նշանակել Արտաշատի ԲԿ-ի գլխավոր բժիշկ և տնօրեն։
Չկա՞ր մարդ, ով ուներ համապատասխան կրթություն, համապատասխան գիտելիքներ և այլն» - իր խոսքում նշեց իրավապաշտպանը։
Անուշ Պողոսյանը կառավարության կողմից նման քայլը գնահատում է, որպես տնավարություն, որովհետև իր խոսքով՝ դրանով փորձում են Արտաշատի ԲԿ-ի բուն խնդիրները թաքցնել։
Ավելի ուշ հայտնի դարձավ, որ Արտաշատի ԲԿ-ի խնդիրները միայն աշխատավարձերի կուտակած 500-600 միլիոն դրամի հասնող պարտքերը չէին, ՊՎԾ-ն տնօրենի ազատումից հետո ստուգումներ է սկսել այս հիվանդանոցում ու հայտնաբերել է մեկ միլիարդը գերազանցող չարաշահումներ կամ ոչ նպատակային ծախսեր, այս մասին նորից տեղեկանում ենք ոլորտի իրավապաշտպան Անուշ Պողոսյանից։
Ստացվում է՝ Պետությունը վարկեր է վերցնում ու մարում է անբարեխիղճ տնօրենի կառավարման բացերի պատճառով կուտակված աշխատավարձերի պարտքը ու պատասխանատվության հարց օրակարգ չի բերում և չի փնտրում մեղավորների, իրավիճակը համենայն դեպս այսպիսի նկարագրություն ունի։ Եվ մյուս աբսուրդային քայլը, որ կրկին արվել է պետության կողմից՝ պարտքերի բեռի տակ կքված ԲԿ-ին առանց աուդիտի անցկացման մեկ այլ տնօրենի նշանակումով փորձել է ճգնաժամային լուծում տալ ՝ կարկատան անելով։
Հարցին, թե պատրաստվու՞մ է վերահսկել այս ֆինանսական խնդիրների լուծման գործընթացին, իրավապաշտպանը պատասխանեց, որ խնդիրն այն է, որ իրենց հասարակական կազմակերպությունը բազմիցս դիմել է առողջապահության նախարարությանը՝ այսպիսի դեպքերում հանրային վերահսկողություն իրականացնելու համար, սակայն մերժվել է:
