Վրաստանի նախագահ Սալոմե Զուրաբիշվիլին դժգոհություն է հայտնել խորհրդարանական ընտրությունների արդյունքների դեմ բողոքող ընդդիմության գործողություններից։
«Ընդդիմությունից ոչ ոք գոհ չէ՝ ո՛չ ես, ո՛չ էլ բնակչությունը, որովհետև մենք գիտեինք գործողությունների ծրագիրը՝ ըստ կանոնադրության ինչպես պետք է գայինք հաջորդ ընտրություններին»,- ասել է Զուրաբիշվիլին Mtavari Arkhi-ին տված հարցազրույցում։
Ինչպես նշել է նախագահը, քաղաքական կուսակցությունները պատրաստվում էին ընտրությունների, ոչ թե փողոցային ցույցերի։
«Պետք է ավելի շատ համակարգվածություն լինի, սա ժողովրդի պահանջն է»,- հավելել է նա։
Հոկտեմբերի 26-ին Վրաստանում տեղի են ունեցել խորհրդարանական ընտրություններ։ Իշխող «Վրացական երազանք-Ժողովրդավարական Վրաստան» կուսակցությունը հաղթել է ձայների 53,93%-ով եւ ստացել օրենսդիր մարմնում 150 մանդատներից 89-ը։
