Ղազախստանի իշխանություններն ակնկալում են ՌԴ նախագահ Վլադիմիր Պուտինի պետական այցի ընթացքում համագործակցության վերաբերյալ կարևոր փաստաթղթերի ստորագրում։ Այս մասին ռուսական ԶԼՄ-ների փոխանցմամբ՝ հայտարարել է Ղազախստանի խորհրդարանի Սենատի (վերին պալատի) նախագահ Մաուլեն Աշիմբաևը՝ ՌԴ Դաշնային ժողովի Դաշնության խորհրդի նախագահ Վալենտինա Մատվիենկոյի հետ երկկողմ հանդիպման ժամանակ։
«Մեր դեսպանատունը ակտիվ աշխատում է, կառավարությունն ակտիվ աշխատում է, կարծում եմ, որ այցը նշանակալից կլինի, կքննարկվեն շատ կարևոր պայմանագրեր, կստորագրվեն կարևոր փաստաթղթեր»,- ասել է նա։
Աշիմբաևը նշել է, որ Աստանան սպասում է նաև Մատվիենկոյի պաշտոնական այցին, որը նախատեսված է Պուտինի այցից հետո։
«Մենք կարոտում ենք ձեզ, մենք սպասում ենք ձեզ, որովհետև ուզում ենք ավելի շատ շփվել, մենք սպասում ենք ձեր պաշտոնական այցի»,-ասել է նա՝ դիմելով Մատվիենկոյին։
Հանդիպումը կայացել է Սանկտ Պետերբուրգում ԱՊՀ անդամ պետությունների միջխորհրդարանական վեհաժողովի նիստի շրջանակներում։
ՌԴ նախագահ Վլադիմիր Պուտինի պետական այցը Ղազախստան կկայանա նոյեմբերի 27-ին։ Պուտինն ավելի վաղ պաշտոնական այցով Ղազախստան էր այցելել 2023 թվականի նոյեմբերին։ 2024 թվականի հուլիսին Աստանայում մասնակցել է Շանհայի համագործակցության կազմակերպության գագաթնաժողովին։
