Ողջ աշխարհն այժմ ամենաանհանգստացնող ժամանակաշրջանն է ապրում՝ կապված ուկրաինական հակամարտության հետ, սակայն դրա լուծման հույսը մնում է ԱՄՆ նորընտիր նախագահ Դոնալդ Թրամփի գալիք երդմնակալության հետ։ Նման կարծիք է հայտնել Հունգարիայի վարչապետ Վիկտոր Օրբանը՝ ելույթ ունենալով Կոսուտ ռադիոկայանի առավոտյան հաղորդման եթերում։
«Հիմա եկել է «ամենամութ ժամը», բայց միշտ մութը լուսաբացից առաջ է»,- ասել է կառավարության ղեկավարը՝ անդրադառնալով Ուկրաինայի շուրջ ստեղծված իրավիճակին։ Նա հաստատել է, որ հարևան երկրում հակամարտությունը կարգավորելու հույսերը դեռևս կապում է Դոնալդ Թրամփի Սպիտակ տուն առաջիկա վերադարձի հետ, ով պատրաստակամություն է հայտնել փնտրել այս խնդրի խաղաղ լուծումը։
«Ռազմական տեսանկյունից իրավիճակը պարզ է. եթե Միացյալ Նահանգները լքի Ուկրաինան, Եվրոպան չի կարողանա ինքնուրույն աջակցել նրան», - ասել է Օրբանը։
Նա ընդգծել է, որ Միացյալ Նահանգների քաղաքականության ակնկալվող փոփոխությունն անխուսափելիորեն կանդրադառնա ուկրաինական հակամարտության նկատմամբ Արևմտյան Եվրոպայի մոտեցման վրա։
