Իտալացի խաղաղապահները, որոնք ծառայում են Լիբանանում ՄԱԿ-ի ժամանակավոր ուժերի (UNIFIL) կազմում, ենթարկվել են հրթիռակոծության, որը հավանաբար իրականացրել է «Հեզբոլլահը», ասել է Իտալիայի արտգործնախարար Անտոնիո Տայանին: Այս մասին հայտնում է ANSA-ն։
«Դրանք, հավանաբար, «Հեզբոլլահի» թեթև հրթիռներ էին, որոնք խոցել են Լիբանանի Շամաա քաղաքի բազան։ Նրանք իրավունք չունեին դա անելու։ Դրանք այն զորքերն են, որոնք ստացել են անվտանգության երաշխիքներ, այդ թվում՝ «Հեզբոլլահից»,-ասել է նախարարը:
Այնտեղ եղել է ութ հրթիռ։ Իտալիայի պաշտպանության նախարարության տվյալներով՝ միջադեպի ժամանակ զոհեր և վիրավորներ չկան։ Հրթիռները խոցել են բազայի պահեստը և բաց տարածքը։
UNIFIL-ը հայտնել է, որ հրթիռային հարվածը լուրջ վնաս է հասցրել վերանորոգման կետին:
Իսրայելի պաշտպանության բանակի ներկայացուցիչը ANSA-ին ասել է, որ իսրայելցի զինվորականները միջադեպին չեն մասնակցել:
Արգենտինան՝ UNIFIL առաքելությանը մասնակցող 48 երկրներից մեկը, նրա ղեկավարությանը ծանուցել է իր սպաների դուրսբերման մասին։ UNIFIL-ը չի պատճառաբանել այս քայլը և առաջարկել է համապատասխան հարցերը ուղղել Արգենտինայի իշխանություններին։
