Խորհրդարանական ընդդիմությունը՝ «Ուժեղ Հայաստան» և «Հայաստան» դաշինքների խմբակցությունների ներկայացուցիչներով, օգոստոսի 25-ին բոյկոտել է Ազգային ժողովի նիստը։
Նախօրեին «Ուժեղ Հայաստանից» պատգամավորները լքել էին նիստերի դահլիճը՝ երկրի վարչապետ Նիկոլ Փաշինյանի և իշխող «Քաղաքացիական պայմանագիր» կուսակցության պատգամավորների սադրիչ վարքագծի պատճառով։
Բանն այն է, որ վարչապետը, ԱԺ ամբիոնից ներկայացնելով Կառավարության ծրագրի նախագիծը, Ամենայն հայոց կաթողիկոս Գարեգին Բ-ին հիշատակելիս միտումնավոր մի քանի անգամ նրան կոչել է աշխարհիկ անունով, ինչը եկեղեցական ավանդույթի տեսանկյունից կոպիտ վիրավորանք և անհարգալից վերաբերմունքի դրսևորում է։ Ի պատասխան՝ ընդդիմադիր պատգամավորները սկսել էին հարվածել սեղաններին։ Սակայն դա միայն ավելի էր ոգևորել Փաշինյանին, որը մի քանի անգամ կրկնել էր իր խոսքերը։ Կառավարության ղեկավարի «ֆլեշմոբին» միացել էին իշխող կուսակցության պատգամավորները։ Նրանք սկսել էին ծափահարել և կատակներ անել ընդդիմության հասցեին։ Արդյունքում «Ուժեղ Հայաստանից» պատգամավորները լքել էին խորհրդարանի նիստերի դահլիճը։
Բացի այդ, այսօր առավոտյան Հակակոռուպցիոն կոմիտեն հայտնել է, որ քրեական վարույթի շրջանակում մի քանի տասնյակ հասցեներում անցկացվել են խուզարկություններ և այլ դատավարական գործողություններ։ Մասնավորապես, խուզարկություններ անցկացվել են Հայաստանի երկրորդ նախագահ Ռոբերտ Քոչարյանի և նրա որդու՝ խորհրդարանի պատգամավոր Լևոն Քոչարյանի տներում։ Ինքը՝ նախագահը, և նրա ավագ որդին ձերբակալվել են։
Օգոստոսի 24-ին Լևոն Քոչարյանի և վարչապետ Նիկոլ Փաշինյանի միջև խորհրդարանում տեղի է ունեցել վեճ։ Վերջինս ԱԺ ամբիոնից ուղիղ խոստացել է խլել պատգամավորի ամբողջ ունեցվածքը՝ միաժամանակ հայտարարելով, որ նա չի կարողանա այն ժառանգաբար փոխանցել երեխաներին և թոռներին։
