Վրաստանի կառավարության ղեկավար Իրակլի Կոբախիձեն արձագանքել է նախկին նախագահ Միխեիլ Սաակաշվիլիի խոսքերին։ Վերջինս, գտնվելով անազատության մեջ, հայտարարել էր, որ անկախ բանտում անցկացրած ժամանակահատվածից՝ ազատ կարձակվի ճիշտ այնպես, ինչպես Հարավային Աֆրիկայի նախկին ղեկավար Նելսոն Մանդելան անմիջապես բանտից եկավ իշխանության։
«Սաակաշվիլին մի երևույթ է, որը պետք է գնահատեն ոչ թե քաղաքական գործիչները, այլ այլ ոլորտների մասնագետները։ Այս մարդը լիովին կտրված է առողջ բանականության հետ կապված ամեն ինչից։ Այդպես էր, երբ նա ինը տարի զբաղեցրել է նախագահի պաշտոնը, այդպես էր, երբ միացել էր ընդդիմությանը, իսկ այսօր նրա վիճակն ավելի ծանր է դարձել։ Սա այն գնահատականներից մեկն է, որը ես կարող եմ տալ», - լրագրողների հետ զրույցում նշել է Կոբախիձեն։
Վարչապետի պնդմամբ՝ նախկինում Սաակաշվիլին իրեն համեմատում էր նաև վրաց թագավոր Դավիթ Շինարարի հետ, ինչը, ըստ նրա, նույնպես վկայում է իրականությունից կտրված լինելու մասին։
Վրաստանում Սաակաշվիլիի դեմ հարուցվել է հինգ քրեական գործ, որոնք վերաբերում են պատգամավոր Վալերի Գելաշվիլիին ծեծի ենթարկելուն, բանկի աշխատակից Սանդրո Գիրգվլիանիի սպանության գործով դատապարտվածներին ներում շնորհելուն, պետական միջոցների յուրացմանը, 2007 թվականի բողոքի ցույցը ցրելուն և սահմանն ապօրինի հատելուն։ Կայացված չորս դատավճիռներով նրա ազատազրկման ժամկետը սահմանված է մինչև 2034 թվականը։
