ՆԳ նախարար Արփինե Սարգսյանը «ՍիվիլՆեթ»-ին տված հարցազրույցում տեղեկացրել է, որ նոր կենսաչափական համակարգի մեկնարկը նախատեսվում է 2026 թվականի աշնանը։
«Մեր քաղաքացիներն արդեն շատ շուտով կօգտվեն անձը հաստատող նոր՝ կենսաչափական փաստաթղթերի համակարգից։ Վերջին տարիներին մենք բազմիցս խոսել ենք այս ծրագրի մասին, և այսօր արդեն կարող եմ ասել, որ դրա գործարկման պահն իսկապես մոտ է։
Կենսաչափական համակարգի աշխատանքը կմեկնարկի այս տարվա աշնանը։ Առաջին փուլում կբացվի 14 սպասարկման գրասենյակ, իսկ մինչև հաջորդ տարվա մարտ դրանց թիվը կհասնի 23-ի։ Այստեղ քաղաքացիները ոչ միայն կստանան նոր նմուշի կենսաչափական փաստաթղթեր, այլև կօգտվեն բոլորովին նոր և ժամանակակից սպասարկման մշակույթից»,- նշել է Արփինե Սարգսյանը։
Ըստ նախարարի՝ նոր համակարգի ներդրումից հետո Հայաստանի Հանրապետության կողմից տրամադրվող բոլոր անձնագրերն ու փաստաթղթերը կլինեն կենսաչափական, իսկ հին նմուշի փաստաթղթերի արտադրությունը դադարեցվելու է։
Այնուամենայնիվ, վավեր անձնագիր ունեցող քաղաքացիները պարտավորված չեն լինի անմիջապես փոխել դրանք, քանի որ հին փաստաթղթերը կգործեն մինչև դրանց վավերականության ժամկետի ավարտը, թեև քաղաքացիները կարող են դրանք փոխարինել ավելի շուտ՝ սեփական ցանկությամբ։
Եթե անձնագիրը վնասվի, կորչի, դրա վիզաների էջերը լրանան կամ այլ պատճառով փոխանակման կարիք առաջանա մինչև ժամկետի ավարտը, քաղաքացուն կտրամադրվի նոր կենսաչափական փաստաթուղթ։
«ԻԿԱՕ-ի չափանիշներին չհամապատասխանող անձնագրերը շրջանառությունից դուրս են գալու փուլային եղանակով։ Մենք չենք ընտրել կոշտ կամ քաղաքացիների համար անհարմար լուծումներ։ Այս պահին վերջնաժամկետ սահմանված չէ, սակայն բնական է, որ ինչ-որ պահից սկսած Հայաստանի Հանրապետությունում շրջանառության մեջ պետք է մնան միայն ԻԿԱՕ-ի չափանիշներին համապատասխանող անձնագրերը։ Սա միջազգայնորեն ընդունված ստանդարտ է, և մենք հետևողականորեն շարժվում ենք այդ ուղղությամբ»,- ընդգծել է ՆԳ նախարարը։
