Գյումրու տնակներից մեկում բնակվող 44-ամյա Ա․ Գ․-ն երկու օր շարունակ զանգահարել է ոստիկանության օպերատիվ կառավարման կենտրոն՝ սպառնալով զենք ճարել ու պայթեցնել ոստիկանության Մուշ բաժնի շենքը, եթե աշխատակիցները իր զանգերին չպատասխանեն ու իր երեխաներին տեսակցելու համար միջոցներ չձեռնարկեն։ Այդ մասին հայտնում է aravot.am-ը։
Ոստիկանության աշխատակիցները նոյեմբերի 1-ին այցելել են Ա․Գ․-ին, ով հայտնել է, թե գտնվել է վրդովված և նյարդայնացած վիճակում, քանի որ Մուշի բաժնի աշխատակիցները որևէ միջոց չեն ձեռնարկում իր երեխաներին տեսակցելու համար, և եթե ցանկություն ունենա ոստիկանության բաժինը պայթեցնելու, ապա զինամթերք կգնի այն իրականացնելու համար։
Նա նաև դժգոհել է, թե զանգահարում է ոստիկանության Մուշ բաժին, միտումնավոր չեն պատասխանում իր զանգերին կամ այնպես են անում, իբրև չեն լսում իր ձայնը, «ալո» են անում ու կախում։ Քաղաքացին հաջորդ օրը՝ նոյեմբերի 2-ին ևս զանգահարել է ոստիկանության օպերատիվ կառավարման կենտրոն՝ այս անգամ ևս նախազգուշացելով, որ եթե ոստիկանության Մուշ բաժինն իր պարտականությունները չկատարի, ինքը կգնա շենքը կպայթեցնի, ինքնաձիգով ինչ-որ բան կանի:
Ոստիկանները դարձյալ այցելել են նրան, ով հայտնել է, թե մի շաբաթ է՝ ահազանգեր է կատարում, սակայն ոստիկանությունն իր պարտականությունները չի կատարում, դրա համար էլ ահազանգում նման կերպ է արտահայտվել և հավելել, որ զենք-զինամթերք չունի, բայց ցանկության դեպքում կարող է ձեռք բերել և պայթեցնել Մուշի բաժինը:
