Շաբաթ օրը Պակիստանում և հարևան Աֆղանստանում տեղի է ունեցել 5,9 մագնիտուդով երկրաշարժ, որը խուճապ է առաջացրել բնակիչների շրջանում, նրանք շտապ լքել են իրենց տները, հաղորդել է Associated Press-ը։
Իշխանությունները հայտնել են, որ այս պահին ավերածությունների կամ տուժածների վերաբերյալ տեղեկություններ չեն ստացվել։
Պակիստանի օդերևութաբանական վարչության տվյալներով՝ ստորգետնյա ցնցումների էպիկենտրոնը գտնվել է Աֆղանստանի տարածքում՝ Հինդուկուշ լեռնաշղթայի շրջանում։
Երկրաշարժը զգացվել է Իսլամաբադում, ինչպես նաև արևելյան Փենջաբ նահանգում և հյուսիսարևմտյան Հայբեր-Փահթունհվա նահանգում, որը սահմանակից է Աֆղանստանին։ Ցնցումներ են գրանցվել նաև Քաշմիրի պակիստանյան հատվածում։
Հայբեր-Փահթունհվա նահանգում արտակարգ ծառայությունները բերվել են բարձր պատրաստվածության ռեժիմի։ Արտակարգ իրավիճակների նահանգային վարչության ներկայացուցիչ Անվար Շահզադը հայտնել է, որ նախնական գնահատմամբ՝ ո՛չ զոհեր, ո՛չ ավերածություններ չեն հայտնաբերվել։
Պակիստանը գտնվում է սեյսմաակտիվ գոտում և պարբերաբար բախվում է երկրաշարժերի։ Ամենակործանարարներից մեկը եղել է 2005 թվականի 7,6 մագնիտուդով երկրաշարժը, որի հետևանքով Պակիստանում և Քաշմիրում զոհվել են տասնյակ հազարավոր մարդիկ։
