Շաբաթ առավոտյան Իսրայելի կողմից Գազայի հատվածում հասցված հարվածի հետևանքով զոհվել է առնվազն երկու երեխա։ Այս մասին հայտնում է Associated Press-ը՝ հղում անելով Պաղեստինի առողջապահության պաշտոնյաներին։
Չնայած Իսրայելի և «Համաս»-ի միջև հոկտեմբերին կնքված հրադադարին, Գազայի հատվածում գրեթե ամեն օր տեղի են ունենում իսրայելական հարձակումներ, որոնց հետևանքով, Գազայի առողջապահության նախարարության հաղորդմամբ, զոհվել է ավելի քան 1007 պաղեստինցի։
Շաբաթ օրը Գազա քաղաքի բնակարաններից մեկի ուղղությամբ հարված է հասցվել տեղի ժամանակով ժամը 2-ի սահմաններում։ Ըստ նախարարության, զոհերի թիվը կարող է աճել, քանի որ փրկարարական խմբերը աշխատում են ավելի շատ դիակներ դուրս բերելու ուղղությամբ: Վիրավորների թվի մասին դեռևս տեղեկություններ չկան:
Երկու քույրերի՝ 4-ամյա Զինայի և 14-ամյա Լանայի մարմինները ուղարկվել են Շիֆա հիվանդանոցի դիահերձարան։
Իսրայելի զինված ուժերը անմիջապես հայտարարություն չեն տարածել, բայց հայտարարել են, որ հետաքննում են միջադեպը։ Իսրայելը պնդում է, որ թիրախավորում է «Համաս»-ին և այլ զինյալների, որոնք սպառնալիք են ներկայացնում։
Հրադադարից ի վեր զոհվել է հինգ իսրայելցի զինվոր։
Պատերազմը բռնկվել է, երբ Համասի գլխավորած զինյալները 2023 թվականի հոկտեմբերի 7-ին ներխուժել էին Իսրայելի հարավ՝ սպանելով 1200 մարդու և պատանդ վերցնելով 251-ի: Գազայի հատվածում Իսրայելի կողմից ձեռնարկված պատասխան ռազմական հարձակման հետևանքով այդ ժամանակվանից ի վեր զոհվել է 73,018 պաղեստինցի, այդ թվում՝ հրադադարից հետո սպանվածները, շաբաթ օրը հայտարարել է Գազայի առողջապահության նախարարությունը:
Ըստ առողջապահության նախարարության, գրանցված մահվան դեպքերի մոտ կեսը կանայք և երեխաներ են։
