Իսպանական Diario AS պարբերականի հաղորդմամբ՝ Մադրիդի «Ռեալը» ծավալուն զեկույց է ուղարկել ՈւԵՖԱ՝ պահանջելով խստագույնս պատժել կատալոնական «Բարսելոնային» Իսպանիայի մրցավարների տեխնիկական կոմիտեի նախկին փոխնախագահ Խոսե Մարիա Էնրիկես Նեգրեյրայի աղմկահարույց գործի կապակցությամբ։
Մադրիդյան ակումբի և նրա նախագահ Ֆլորենտինո Պերեսի պահանջները հետևյալն են՝
1.Հեռացնել «Բարսելոնային» եվրագավաթների խաղարկություններից։
2.Զրկել ակումբին 2001-ից մինչև 2018 թվականներն ընկած ժամանակահատվածում նվաճած 23 տիտղոսներից:
Մադրիդում վստահ են, որ նշված տարիներին կատալոնական ակումբի կողմից միջնորդ ընկերությունների միջոցով Նեգրեյրային փոխանցված գումարներն ուղղված են եղել մրցավարների որոշումների վրա ազդեցություն գործելուն։ Մինչդեռ «Բարսելոնան» ավելի վաղ պարզաբանել էր, թե վճարումները կատարվել են բացառապես մրցավարության վերաբերյալ վերլուծական հաշվետվություններ ստանալու նպատակով։
Ըստ աղբյուրի տվյալների՝ ՈւԵՖԱ-ն իր վերջնական որոշումը կկայացնի միայն այս գործով ընթացող դատական գործընթացների ամբողջական ավարտից հետո: Միաժամանակ ընդգծվում է, որ եվրոպական ֆուտբոլի բարձրագույն կառույցը դժվար թե գնա նման ծայրահեղ քայլի և բավարարի «Ռեալի» կոշտ պահանջները։
Հիշեցնենք, որ ներկայումս «Բարսելոնան» հանդիսանում է Իսպանիայի ֆուտբոլի գործող չեմպիոնը, իսկ Մադրիդի «Ռեալը» 2025/2026 մրցաշրջանի արդյունքներով Լա լիգայում զբաղեցրել է երկրորդ հորիզոնականը։
