«Armenian Collection Monte-Carlo 2026»-ի շրջանակում կներկայացվեն հայ ոսկեգործների և ադամանդագործների լավագույն ստեղծագործությունները 2026 թվականին Մոնակոյում նախատեսվում է կազմակերպել բացառիկ մասշտաբի հայկական ոսկերչական արվեստի և ադամանդագործության ցուցահանդես, որը միավորելու է հայկական ծագում ունեցող լավագույն ոսկերչական տները, հեղինակավոր դիզայներներին և միջազգային ճանաչում ունեցող ընկերություններին։
Նախագիծը իրականացվելու է «Armenian Collection Monte-Carlo 2026» մշակութային և ցուցահանդեսային նախաձեռնության շրջանակում և նպատակ ունի Մոնակոյի բարձրաճաշակ ու շքեղ միջավայրում ներկայացնել հայկական արվեստի, վարպետության և ստեղծարար մտածողության լավագույն դրսևորումները։
Հաշվի առնելով հայ ոսկեգործների և ադամանդագործների համաշխարհային ճանաչելիությունն ու տարիների ընթացքում ձևավորված բարձր հեղինակությունը՝ նախաձեռնության կազմակերպիչները որոշել են Մոնակոյում ստեղծել յուրահատուկ հարթակ, որտեղ կներկայացվեն ոչ միայն Հայաստանի, այլև աշխարհի տարբեր երկրներում գործունեություն ծավալող հայկական ոսկերչական ընկերությունների բացառիկ հավաքածուները։
Ցուցահանդեսին կմասնակցեն ոլորտի այն ներկայացուցիչները, որոնք արդեն իսկ մեծ համբավ ունեն միջազգային շուկայում և կարող են բարձր մակարդակով ներկայանալ Մոնակոյի նման պահանջկոտ և շքեղության բարձր չափանիշներով հայտնի միջավայրում։
Նախագծի առանցքային նպատակներից է ներկայացնել այնպիսի յուրահատուկ և արտիստիկ աշխատանքներ, որոնք կկարողանան առանձնանալ նույնիսկ Մոնակոյի շքեղության աշխարհում, գրավել բարձրաճաշակ այցելուների ուշադրությունը և ստեղծել հայկական ոսկերչական արվեստի նկատմամբ նոր հետաքրքրություն եվրոպական էլիտար շրջանակներում։
Կազմակերպիչների փոխանցմամբ՝ արդեն ձեռք են բերվել նախնական պայմանավորվածություններ Մոնակոյում գործող մի շարք հեղինակավոր ոսկերչական սրահների և բուտիկների սեփականատերերի հետ։ Վերջիններս պատրաստակամություն են հայտնել համագործակցելու հայկական ընկերությունների հետ և, համապատասխան բացառիկ հավաքածուների առկայության դեպքում, ներկայացնել հայկական աշխատանքները իրենց ցուցասրահներում՝ հիմք դնելով երկարաժամկետ գործընկերային հարաբերությունների։
«Armenian Collection Monte-Carlo 2026»-ը միայն ոսկերչական ցուցահանդեսով չի սահմանափակվելու։ Նախատեսվում է նաև հայկական լուսանկարչական արվեստի և մշակութային արտադրանքների ցուցադրություն, ինչպես նաև առանձին ցուցասրահում կներկայացվեն հայ փոքրիկ նկարիչների ստեղծագործությունները։
Միջոցառման շրջանակում կանցկացվի նաև բարեգործական համերգ՝ միջազգային ճանաչում ունեցող հայ երաժիշտների մասնակցությամբ։ Նախաձեռնության հեղինակների համոզմամբ՝ նախագիծը կարող է դառնալ հայկական մշակութային և ստեղծարար ներուժի միջազգային ներկայացման կարևոր հարթակ՝ միաժամանակ նոր բիզնես հնարավորություններ ստեղծելով հայկական արվեստի և արտադրանքի համար եվրոպական շուկայում։ Միջոցառման վերաբերյալ լրացուցիչ մանրամասները կհրապարակվեն առաջիկայում։
