Իրանի իշխանությունները մտադիր չեն Վաշինգտոնին փոխանցել հարստացված ուրան՝ չնայած ԱՄՆ նախագահ Դոնալդ Թրամփի հակառակ պնդումներին:Այս մասին Associated Press-ին տված հարցազրույցում հայտարարել է Իրանի ԱԳ փոխնախարար Սայիդ Խաթիբզադեն, հաղորդում է ՌԻԱ Նովոստի-ն:
«Կարող եմ հավաստիացնել ձեզ, որ հարստացված նյութեր չեն մատակարարվի Միացյալ Նահանգներ: Դա անընդունելի է, և ես կարող եմ հավաստիացնել ձեզ, որ թեև մենք պատրաստ ենք դիտարկել ցանկացած մտահոգություն, որն առկա է, մենք չենք ընդունի անընդունելի տարբերակներ»,- գործակալությունը մեջբերում է Խաթիբզադեի խոսքերը։
Իրանի ԱԳ փոխնախարարը նաև նշել է, որ Թեհրանը պատրաստ չէ ամերիկացի պաշտոնյաների հետ առերես բանակցությունների նոր փուլ անցկացնել։ Իսլամական հանրապետությունը ձգտում է ավարտին հասցնել «շրջանակային համաձայնագիրը»՝ նախքան առերես հանդիպմանն անցնելը։
«Մենք դեռ պատրաստ չենք իրական հանդիպման, քանի որ կան հարցեր, որոնց շուրջ ամերիկացիները դեռ չեն հրաժարվել իրենց մաքսիմալիստական դիրքորոշումից»,- հավելել է դիվանագետը։
Նա նաև հայտնել է, որ ԱՄՆ-ի հետ բանակցությունների շրջանակում Հորմուզի նեղուցի համար կներդրվի նոր արձանագրություն, և այն կմնա բաց ու անվտանգ ողջ քաղաքացիական նավագնացության համար։
