Թեհրանը պատրաստ է թույլատրել Ճապոնիա մեկնող նավերի անցումը Հորմուզի նեղուցով՝ Տոկիոյի հետ համապատասխան խորհրդակցություններից հետո, հայտարարել է Իրանի արտգործնախարար Աբբաս Արաղչին «Կիոդո» լրատվական գործակալությանը տված հարցազրույցում։ «Մենք նեղուցը չենք փակել։ Այն բաց է», - ասել է արտգործնախարարը։
Գործակալությունը, առանց նրան մեջբերելու, հաղորդել է, որ Տոկիոյի հետ խորհրդակցություններ են սկսվել Ճապոնիայի հետ կապված նավերի Հորմուզի նեղուցով անցնելու վերաբերյալ։ Ավելի վաղ իրանցի պաշտոնյաները զգուշացրել էին, որ թույլ չեն տա ԱՄՆ-ին և նրա դաշնակիցներին վերաբերող որևէ նավթային բեռ անցնել Հորմուզի նեղուցով։
Իրանի զինված ուժերի կենտրոնական շտաբի խոսնակը նշել է, որ Թեհրանը կդիմի ցանկացած անհրաժեշտ միջոցի, այդ թվում՝ Հորմուզի նեղուցում նավերի երթևեկության վերահսկմանը, որպեսզի թշնամուն ստիպի հանձնվել։
Lloyd's List Intelligence-ի տվյալների համաձայն՝ մարտի 18-ի դրությամբ նեղուցով անցել է Հունաստանի, Իրանի և Չինաստանի հետ կապված մոտ 90 նավ։
