Ռուսաստանը Իրանի շուրջ ստեղծված իրավիճակում կցանկանար բոլոր կողմերից ակնկալել զսպվածություն և կողմնորոշում դեպի խաղաղ կարգավորում, հայտարարել է ՌԴ նախագահի մամուլի քարտուղար Դմիտրի Պեսկովը։
«Ռուսաստանը շարունակում է ջանքեր գործադրել լարվածության թուլացմանը նպաստելու համար։ Եվ, իհարկե, տվյալ դեպքում մենք կցանկանայինք բոլոր շահագրգիռ կողմերից ակնկալել զսպվածություն և բացառապես խաղաղ բանակցությունների վրա հիմնված մոտեցում՝ այն խնդիրների կարգավորման համար, որոնք ներկայումս արդիական են թվում»,-ասել է Պեսկովը լրագրողներին՝ մեկնաբանելով Իրանի շուրջ իրավիճակը։
ԱՄՆ նախագահ Դոնալդ Թրամփը հունվարի 22-ին հայտարարել էր, որ ԱՄՆ ռազմածովային ուժերի նավերը «ամեն դեպքում» շարժվում են Իրանի ուղղությամբ։ Մինչ այդ նա չէր կարողացել հստակ պատասխան տալ այն հարցին, թե արդյոք Իրանի դեմ ռազմական միջամտության տարբերակը հանված է օրակարգից՝ նշելով միայն, որ չի կարող ասել, թե ինչ տեղի կունենա ապագայում։
