G7 երկրների մեծ մասի առաջնորդները պլանավորում են մասնակցել ԱՄՆ նախագահ Դոնալդ Թրամփի և Վլադիմիր Զելենսկու միջև Դավոսում կայանալիք Համաշխարհային տնտեսական ֆորումի (WEF) շրջանակներում նախատեսված հանդիպմանը, հաղորդում է Financial Times-ը (FT)՝ հղում անելով երեք անանուն աղբյուրների։
Նրանց տեղեկությունների համաձայն՝ հունվարի 21-ին նախատեսված հանդիպման հիմնական նպատակն է փորձել ստանալ Թրամփի անձնական հավանությունը Ուկրաինայի անվտանգության երաշխիքների վերաբերյալ։
Հոդվածում նշվում է, որ այս նպատակներով Մեծ Բրիտանիայի, Իտալիայի և Կանադայի վարչապետներ Քիր Սթարմերը, Ջորջիա Մելոնին և Մարկ Քարնին, Գերմանիայի կանցլեր Ֆրիդրիխ Մերցը, Ֆրանսիայի նախագահ Էմանուել Մակրոնը և Եվրահանձնաժողովի նախագահ Ուրսուլա ֆոն դեր Լայենը պլանավորում են մեկնել Շվեյցարիա։
Հնարավոր է, որ հանդիպմանը միանան նաև այսպես կոչված կոալիցիայի մեջ մտնող այլ երկրների ղեկավարներ, որոնք պատրաստ են օգնել Ուկրաինային: Հրատարակությունը գրում է, որ նախատեսվում է զուգահեռաբար անցկացնել կոալիցիայի երկրների ազգային անվտանգության խորհրդականների հանդիպում:
